અમદાવાદ: અમદાવાદના મણીનગર પોલીસ સ્ટેશનમાં મહિલા દર્દીએ સારવાર કરનાર ડોકટર વિરુધ્ધ બળાત્કાર અને પૈસા પડાવ્યાની ફરિયાદ નોંધાવી છે. પોલીસે ડોકટર આરોપીની ધરપકડ કરી ને તપાસ શરૂ કરી છે. આ ડોકટર નિલેશ નાયક પર તેના જ મહિલા દર્દીએ બળાત્કાર સહિત પૈસા પડાવી લેવાની ફરિયાદ મણીનગર પોલીસ સ્ટેશનમાં નોંધાવી છે.
પ્રાપ્ત રિપોર્ટ મુજબ, નારોલમાં 35 વર્ષીય મહિલા તેના પરિવાર સાથે રહે છે. જેમાં ડાયાબિટીસ, ચામડીની સહિતની બીમારી હોવાથી તેઓ અવારનવાર મસાજ કરાવવા જતા હતા. ત્યારે નિકોલમાં રહેતો ફિઝિયોથેરાપિસ્ટ ડૉ. નિલેશકુમાર નાયકના નારોલ ખાતે આવેલ દવાખાને મહિલા ગઈ હતી. સારવાર દરમિયાન મહિલા અને ડોક્ટર વચ્ચે મિત્રતા બંધાઈ હતી.
ગત મે મહિનામાં મહિલા સારવાર માટે ગઈ હતી. તે સમયે મહિલાને ચક્કર જેવું આવતા ડોક્ટર નિલેશે હું બાટલો ચઢાવી દઉં જેથી સારું થઈ જશે કહીને બાટલામાં બેભાન થવાનું ઇન્જેક્શન આપીને મહિલાને બેભાન કરીને નિવસ્ત્ર કરીને તેના ફોટા અને વીડિયો ઉતારી દીધો હતો. બાદમાં ડોક્ટર નિલેશે મહિલાને બ્લેકમેલ કરીને ચાર લાખ રૂપિયાના દાગીના પણ પડાવ્યા હતા. બાદમાં તેણે બ્લેકમેલીંગનો ખેલ ખેલવાનો શરૂ કર્યો હતો.
ત્યારે આરોપી ડોકટરે કહ્યું કે જો પૈસા નહીં આપો તો તમારા પાડેલા ફોટો વાયરલ કરી દેવાની ધમકી આપી હતી. ત્યારે મહિલા ફરિયાદીએ આત્મહત્યાની ધમકી આપતા આરોપી ડોકટરે મહિલા ફરિયાદીને ફોટો ડિલીટ કરી દેવા અને સમાધાન માટેથી મણીનગરની હોટેલમાં બોલાવીને બળાત્કાર ગુજાર્યો હતો.
આ પ્રકારે 2થી 3 વાર મહિલાને બોલાવી બળાત્કાર ગુજાર્યો હોવાનો આરોપ ફરિયાદમાં કરવામાં આવ્યો છે. આ સમગ્ર મામલે અંતે મહિલા દર્દીએ કંટાળીને મણીનગર પોલીસ સ્ટેશનમાં ફરિયાદ નોંધાવી હતી ત્યારે પોલીસે આરોપી ડોકટર નિલેશ નાયકની ધરપકડ કરી પુરાવા એકત્ર કરવા માટેથી ફોન કબજે કરીને એફએસએલમાં મોકલી આપીને વધુ તપાસ શરૂ કરી છે.