અમદાવાદ : અમદાવાદ સહિત ગુજરાતભરમાં ગરમીનો પારો 40 ડિગ્રીને પાર પહોંચી ગયો છે. હવામાન વિભાગે આગામી દિવસોમાં હીટવેવની આગાહી કરી છે. જેના કારણે અમદાવાદ મ્યુનિસિપલ કોર્પોરેશન સંચાલિત સ્કૂલ બોર્ડે વિદ્યાર્થીઓના હિતમાં મહત્વનો નિર્ણય લીધો છે.જોકે અમદાવાદ મ્યુનિસિપલ સ્કૂલ બોર્ડના શિક્ષક યુનિયન દ્વારા હજુ પણ સમયમાં ફેરફાર કરી વિદ્યાર્થીઓને રાહત મળે તેવી માગ કરવામાં આવી છે. બપોર પાળીની સ્કૂલ સવારના સમય ચલાવવા માગ કરવામાં આવી છે.
પ્રાપ્ત રિપોર્ટ મુજબ, અમદાવાદ મ્યુનિસિપલ કોર્પોરેશન દ્વારા જાહેર કરવામાં આવેલા હીટ એક્શન પ્લાનને લઇ મ્યુનિસિપલ સ્કૂલ બોર્ડે શાળાના સમયમાં ફેરફાર કર્યો છે. સ્કૂલ બોર્ડ દ્વારા એક પરિપત્ર કરવામાં આવ્યો છે. જેમાં ઉનાળુ વેકેશન સુધી શાળાના સમયમાં ફેરફાર કરવામાં આવ્યો છે. આગામી 5 મેથી ઉનાળુ વેકેશન શરૂ થવાનું છે ત્યારે સવાર પાળીનો સમય 7થી 12 અને બપોર પાળીનો સમય 12થી 5નો કરાયો છે.
AMC સ્કૂલ બોર્ડના શિક્ષક યુનિયનના પ્રમુખ મનોજ પટેલએ જણાવ્યું કે, હજુ પણ શાળાના સમયમાં ફેરફાર કરવા શિક્ષક યુનિયનની માગ છે. સવાર પાળીનો સમય 6.30થી 11.30 કરવા તેમજ ધોરણ 1થી 5ના વિદ્યાર્થી કે જેઓ બપોર પાળીમાં અભ્યાસ કરે છે. તેઓનો સમય સવારનો કરવા માગ છે તેમજ સ્કૂલ બોર્ડમાં 12 જેટલી પતરાવાળી સ્કૂલોમાં બાળકો અભ્યાસ કરે છે. જેમને હિટવેવની અસર વધુ થઈ શકે જેથી આ વિદ્યાર્થીઓને સવારે બોલાવવા માગ છે.
શિક્ષક યુનિયનનું માનવું છે કે, બપોર પાળીમાં અભ્યાસ કરતા નાના બાળકોને ગરમીથી વધુ અસર થઈ શકે છે. તેથી, તેમને સવારે બોલાવવાથી તેઓ હીટવેવથી બચી શકશે. સ્કૂલ બોર્ડને આ અંગે રજૂઆત કરવામાં આવી છે અને વિદ્યાર્થીઓના હિતમાં યોગ્ય નિર્ણય લેવાની અપીલ કરવામાં આવી છે.
