અમદાવાદ : અમદાવાદના પાલડી વિસ્તારમાં આવેલા આવિષ્કાર એપાર્ટમેન્ટના એક બંધ ફ્લેટમાં દરોડો પાડી ATS અને DRIએ અંદાજે 95.5 કિલો સોનું અને એક કરોડથી વધુની રોકડ જપ્ત કરાતાં ખળભળાટ મચ્યો છે. આ ઓપરેશન સોમવારથી (17મી માર્ચ, 2025) ચાલતું હતુ જે આજે મંગળવારે સવારે આઠ કલાકે પુરૂં થયું છે. મહેન્દ્ર શાહ અને તેનો પુત્ર મેઘ શાહે પાલડી વિસ્તારમાં ફ્લેટ ભાડે રાખ્યો હતો. અમદાવાદના પાલડી વિસ્તારમાં આવેલા આવિષ્કાર બિલ્ડિંગમાં ફ્લેટ ભાડે રાખી પિતા-પુત્રની જોડી શેરબજારની કાળી કમાણી સોના અને રોકડ તરીકે છૂપાવતા હોવાના મસમોટું કૌભાડ બહાર આવે તેવી શક્યતા છે. તો આટલું મોટું શંકાસ્પદ કૌભાંડ આચરનાર પિતા પુત્રની જોડી કોણ છે?
પ્રાપ્ત રિપોર્ટ મુજબ, મહેન્દ્ર શાહ અને મેઘ શાહ મૂળ ગુજરાતના વાવ થરાદ નજીકના જેતરડા ગામના રહેવાસી છે. મેઘ અને મહેન્દ્ર શાહ મુંબઈના શેરબજાર વર્તુળોમાં આગળ પડતા વ્યક્તિ હોવાનું પણ સામે આવ્યું છે. આરોપી મેઘ શાહ મૂળ જેતાડા ગામનો વતની અને મુંબઈમાં રહેતા હોવાની વિગતો સામે આવી છે.પાલડીમાં મેઘ શાહની બહેન પમ્મી શાહ ચોથા મળે ફ્લેટમાં રહેતી હોવાથી ભાડે મકાન રાખી કરોડોનો મુદ્દામાલ સંતાડ્યો હતો.પિતા પુત્ર રીઅલ એસ્ટેટમાં ફાઈનાન્સ અને રોકડ નાણાં સામે વ્હાઈટની એન્ટ્રીનો ધંધો કરતા હોય શકે તેવી પણ આશંકા છે. તપાસમાં કેટલાંક મોટાં નામો પણ બહાર આવી શકે છે.
એક અહેવાલ મુજબ બંને શેરોના ભાવમાં પણ ચેડાં કરતા હતા.આ ફ્લેટ છેલ્લા ત્રણ મહિનાથી ભાડે આપવામાં આવ્યો હોવાનું સામે આવ્યું છે. સોશિયલ મીડિયા પર ઉપલબ્ધ માહિતી મુજબ મેઘ શાહ પોતે બજાર બાજીગર ગેમ્સ પ્રાઈવેટ લિમિટેડનો ડાયરેક્ટર છે.સૂત્રો પાસેથી મળતી માહિતી અનુસાર, અધિકારીઓએ પહેલા મેઘ શાહની બહેન પમ્મી શાહના નિવાસસ્થાને દરોડા પાડ્યા હતા. જે તે જ બિલ્ડિંગના ફ્લેટ નંબર 403માં રહે છે. ત્યારબાદ, અધિકારીઓએ ફ્લેટ નંબર 104માં ફરી એક સર્ચ ઓપરેશન હાથ ધર્યું.