અમદાવાદ: અમદાવાદમાં ગુનેગારોમાં કાયદો અને વ્યવસ્થાનો કોઈ ડર હોય તેવું લગાતું જ નથી! કારણ કે, ફરી એકવાર ક્રુર હત્યા થઈ હોવાની ઘટના પ્રકાશમાં આવી છે. અમદાવાદના મેઘાણીનગર વિસ્તારમાં આઠ જેટલા લોકોએ એક યુવકની ધારદાર હથિયાર વડે હત્યા કરી હોવાનું પ્રકાશમાં આપ્યું છે. આ મામલે પોલીસ ઘટનાસ્થળે પહોંચીને આગળની કાર્યવાહી હાથ ધરી દીધી છે. પરંતુ પ્રશ્ન છે કે, આવા લોકોમાં ખુલ્લેઆમ હત્યા જેવો ગુનો કરવાની હિંમત આવી ક્યાંથી? પોલીસ અમદાવાદ પોલીસે કાયદો અને વ્યવસ્થા સંભાળવામાં સાર્થક નથી?
પ્રાપ્ત રિપોર્ટ મુજબ, શુક્રવારે રાત્રે કાગડાપીઠ વિસ્તારમાં આવેલી એક દુકાનમાંથી નીતિન પટણી નામના યુવકનું અજાણ્યા શખ્સો દ્વારા અપહરણ કરવામાં આવ્યું હતું. અપહરણ બાદ આ શખ્સો નીતિનને મેઘાણીનગરમાં લઈ ગયા અને ત્યાં તેની ધારદાર હથિયારો વડે હત્યા કરી દીધી. આ ઘટના દરમિયાન આસપાસના લોકો આ લોહિયાળ ખેલના સાક્ષી બન્યા, અને કેટલાક લોકોએ આ ઘટનાનો વીડિયો રેકોર્ડ કરી લીધો, જે હવે સોશિયલ મીડિયા પર ઝડપથી ફેલાઈ રહ્યો છે.વાયરલ થયેલા વીડિયોમાં 7થી 8 શખ્સો નીતિન પર હુમલો કરતા જોવા મળે છે.આ સમગ્ર મામલે અત્યારે સ્થાનિકોમાં ભારે રોષની લાગણી જોવા મળી હતી.
લોહિયાળ ગેંગવોરના કારણે સમગ્ર વિસ્તારમાં ભયનો માહોલ ફેલાયો છે. આ ઘટનાની જાણ થતાં જ પોલીસ કાફલો તાત્કાલિક ઘટનાસ્થળે પહોંચી ગયો હતો અને આ મામલે ગુનો નોંધીને વધુ તપાસ હાથ ધરી હતી. ઉલ્લેખનીય છે કે આ મામલે કાગડાપીઠ પોલીસે વિજય, શૈલેષ અને પૂનમ પટણી નામના 3 આરોપીની ધરપકડ કરી છે. ફરાર આરોપીઓને પકડવા પાંચ ટીમ બનાવવામાં આવી છે.