અમદાવાદ : અમદાવાદના સોલા વિસ્તારમાં એક ચોંકાવનારી ઘટના સામે આવી છે, જેમાં પુત્રએ લગ્ન ન કરાવવાના ઝઘડાને લઈને પોતાની માતાની હત્યા કરી નાખી છે. આ ઘટના ગઈકાલે બની હતી, જ્યારે માતા અને પુત્ર વચ્ચે લગ્નના મુદ્દે તીવ્ર બોલાચાલી થઈ હતી. ઝઘડો એટલો ઉગ્ર બન્યો કે પુત્રએ માતા પર હુમલો કરી દીધો જેના કારણે માતાને ગંભીર ઈજાઓ થઈ હતી. જે ઈજાઓ અંતે મૃત્યુમાં પરિણમી હતી.
પ્રાપ્ત રિપોર્ટ મુજબ, અમદાવાદના સત્તાધાર પાસે વર્ધામાન ફ્લેટમાં દીકરાએ લગ્ન ન કરાવવા મામલે સગી માતા સાથે બોલાચાલી કરી હતી. આ દરમિયાન યુવક ઉગ્ર બનતાં માતાને પરફ્યુમની બોટલ મારી દે છે. જેમાં ઈજા પહોંચતા માતાને સારવાર માટે સોલા સિવિલ હોસ્પિટલ લઈ ગયા હતા, જ્યાં સારવાર દરમિયાન તેમનું મોત નીપજ્યું હતું.
ઘટના બાદ માતાને તાત્કાલિક સોલા સિવિલ હોસ્પિટલમાં સારવાર માટે લઈ જવાયા હતા, પરંતુ ડૉક્ટરોના તમામ પ્રયાસો છતાં તેમનું મોત નીપજ્યું હતુ. સોલા પોલીસે આ ઘટનાને ગંભીરતાથી લઈને આરોપી પુત્રની ધરપકડ કરી છે અને વધુ તપાસ હાથ ધરી છે.
પોલીસના પ્રાથમિક તપાસ અનુસાર, આ ઘટના ઘરેલું ઝઘડાનું પરિણામ છે, જેમાં લગ્ન ન કરાવવાનો મુદ્દો મુખ્ય કારણ હતું. સ્થાનિક સૂત્રોના જણાવ્યા મુજબ, માતા અને પુત્ર વચ્ચે લાંબા સમયથી આ મુદ્દે વિવાદ ચાલી રહ્યો હતો, જે ગઈકાલે હિંસક બન્યો હતો. પોલીસે આરોપીની પૂછપરછ શરૂ કરી છે, અને મૃતદેહને પોસ્ટમોર્ટમ માટે મોકલવામાં આવ્યો છે.