અમદાવાદ : તહેવારો ધીરે-ધીરે નજીક આવી રહ્યાં છે ત્યારે AMCનું ફૂડ વિભાગ હરકતમાં આવ્યું છે. AMCના ફૂડ વિભાગ દ્વારા મીઠાઈ, ફરસાણ અને બેકરીના એકમો ઉપર તપાસ હાથ ધરવામાં આવી રહી છે. અમદાવાદમાં જાણીતા એવા દાસ ખમણની બે બ્રાંચ સીલ કરી દેવાઇ છે. જેમાંથી ટોટલ પોલર કમ્પાઉન્ડ એટલે કે TPCનું પ્રમાણ વધુ માત્રામાં મળી આવ્યું છે. 25 ટકા TPC સામે દાસ ખમણના ફરસાણમાં 60થી 80 ટકા TPC જોવા મળ્યું છે. એકના એક તેલમાં વારંવાર વાનગીઓ તળવામાં આવતી હોવાનું જાણવા મળી રહ્યું છે.
પ્રાપ્ત રિપોર્ટ મુજબ AMCના ફૂડ વિભાગની કાર્યવાહીમાં તેલની ગુણવત્તા સહિતની ચીજોની તપાસ કરતાં દાસ ખમણની બોડકદેવ અને દાણાપીઠ બ્રાન્ચમાં એક જ તેલમાં વારંવાર ફરસાણ તળાતું હોવાથી બંને એકમ સીલ કરાયા હતા. તેલની TPC (ટોટલ પોલર કમ્પાઉન્ડ) 60-80 જેટલી ઊંચી હતી. 13 દિવસમાં જ મ્યુનિ.એ 103 ખાદ્ય પદાર્થના નમૂના લીધા હતા, જેના રિઝલ્ટ આવવાના બાકી છે. 228 એકમમાં તપાસ કરી 154 કિલો ખોરાક અને 67 લિટર તેલવાળા પદાર્થનો નાશ કરી 9 હજાર વહીવટી ચાર્જ વસૂલ કર્યો હતો.
