અમદાવાદ : શહેરમાંથી નશાબંધીના દુષણને નાબૂદ કરવાના ચાલુ મિશનના ભાગરૂપે, અમદાવાદ ક્રાઈમ બ્રાન્ચ દ્વારા મેગા ઓપરેશન શરુ કર્યું છે. છેલ્લા 72 કલાકમાં હાથ ધરવામાં આવેલ આ ઓપરેશનનો મુખ્ય ઉદ્દેશ્ય સ્થાનિક સપ્લાય ચેઈનને તોડવાનો, નાણાકીય નેટવર્કને ટાર્ગેટ કરવાનો અને રીઢા ગુનેગારોની ઓળખ કરવાનો હતો.પોલીસના આ આક્રમક અભિગમથી ડ્રગ્સ માફિયાઓમાં ફફડાટ વ્યાપી ગયો છે.
પ્રાપ્ત રિપોર્ટ મુજબ, ક્રાઇમ બ્રાન્ચની કાર્યવાહી મુજબ, છેલ્લા 72 કલાકમાં ક્રાઈમ બ્રાન્ચે શહેરના વિવિધ વિસ્તારોમાં NDPS એક્ટ હેઠળ 8 નવા કેસ નોંધ્યા છે. 30 થી વધુ જાણીતા ડ્રગ પેડલર્સને આંતરીને તેમની કડક પૂછપરછ અને બેકગ્રાઉન્ડ ચેકિંગ કરવામાં આવ્યું હતું. માત્ર નશાકારક દ્રવ્યો જ નહિ, ડ્રગ્સ ઉપરાંત, “ગોગો” (રોલિંગ પેપર/સ્મોકિંગ કિટ) અને ગેરકાયદેસર ઇ-સિગારેટના વેચાણને લક્ષ્ય બનાવીને પણ અનેક કેસ દાખલ કરવામાં આવ્યા છે.જેથી યુવાધનને બરબાદ થતું અટકાવી શકાય.
ડ્રગ ટ્રેડના લોજિસ્ટિક્સને તોડવા માટે, ક્રાઈમ બ્રાન્ચે ખાસ કરીને નાર્કો-ફાઇનાન્સ પર ધ્યાન કેન્દ્રિત કરીને બે “જાણવા જોગ” (પ્રાથમિક તપાસ) શરૂ કરી છે. તપાસમાં જાણવા મળ્યું છે કે પેડલર્સ વ્યવહાર કરવા અને પોલીસથી બચવા માટે નકલી સિમ કાર્ડ અને બેંકની ખોટી વિગતોનો ઉપયોગ કરી રહ્યા હતા. પરિણામે, પોલીસ હવે આ વ્યક્તિઓ સામે નશાબંધીના ગુના ઉપરાંત છેતરપિંડી અને બનાવટ (ફોર્જરી) માટે BNS (અગાઉની IPC) ની કલમો હેઠળ પણ ગુના નોંધી રહી છે.
પોલીસે આ ઝુંબેશમાં માનવીય અભિગમ દર્શાવ્યો છે, જેમાં ‘એડિક્ટ-પેડલર્સ’ (જેઓ મુખ્યત્વે પોતાના વ્યસનનો ખર્ચ કાઢવા ડ્રગ્સ વેચે છે) ની ઓળખ કરી તેઓને NDPS એક્ટની કલમ 64A હેઠળ, કાયદાકીય કાર્યવાહીમાંથી મુક્તિ મળી રહી છે, જો તેઓ સ્વેચ્છાએ વ્યસનમુક્તિ માટે તબીબી સારવાર લેવા તૈયાર થાય, તેમ એક વરિષ્ઠ અધિકારીએ જણાવ્યું હતું.