અમદાવાદ : ગુજરાતના મુખ્ય પ્રધાન ભૂપેન્દ્ર પટેલે અમદાવાદમાં ફનબ્લાસ્ટની મુલાકાત કરી લીધી હતી. જેથી તસવીરો સોશિયલ મીડિયામાં શેર કરતા લખ્યું કે, ગાંધીનગર લોકસભાના લોકપ્રિય સાંસદ અને કેન્દ્રીય ગૃહ અને સહકારિતા મંત્રી અમિત શાહે પોતાના વિસ્તારની આંગણવાડીઓના બાળકો માટે ખુબ સુંદર અને સંવેદનાપૂર્ણ પહેલ શરૂ કરી છે, ‘રમશે બાળક, ખીલશે બાળક’. આ પહેલ અંતર્ગત, આંગણવાડીઓના બાળકોને રમકડાઓનું વિતરણ તેમજ તેમની સાથે મનોરંજન પ્રવાસ કરવામાં આવે છે.
મુખ્યમંત્રી ભૂપેન્દ્ર પટેલ સવારે 10 વાગ્યે અમદાવાદના એસ.જી. હાઇવે ખાતે આવેલા ફન બ્લાસ્ટમાં પહોંચ્યા હતા. ગાંધીનગર લોકસભા મતવિસ્તારમાં આવતી તમામ વિધાનસભાની આંગણવાડીનાં બાળકો દર શનિવારે એસ.જી. હાઇવે અને સિંધુભવન રોડ પર આવેલા ફન બ્લાસ્ટ ખાતે ગેમ ઝોનમાં રમત રમવા માટે અને મજા કરવા માટે આવતાં હોય છે ત્યારે આજે નાનાં બાળકોની સાથે સમય વિતાવવા માટે મુખ્યમંત્રી ભૂપેન્દ્ર પટેલ પહોંચ્યા હતા.
બાળકોની સાથે બાળક બની જવાનો અનુભવ ખરેખર અદભુત હોય છે..
ગાંધીનગર લોકસભાના લોકપ્રિય સાંસદ અને કેન્દ્રીય ગૃહ અને સહકારિતા મંત્રી શ્રી અમિતભાઈ શાહે પોતાના વિસ્તારની આંગણવાડીઓના બાળકો માટે ખુબ સુંદર અને સંવેદનાપૂર્ણ પહેલ શરૂ કરી છે- રમશે બાળક, ખીલશે બાળક.
આ પહેલ અંતર્ગત,… pic.twitter.com/1rc4FMnHAr
— Bhupendra Patel (@Bhupendrapbjp) December 27, 2025
ફન બ્લાસ્ટ ખાતે પહોંચ્યા ત્યારે નાનાં બાળકો દ્વારા બે હાથ ઊંચા કરીને તેમનું સ્વાગત કરવામાં આવ્યું હતું. ફન બ્લાસ્ટ ગેમ ઝોન ખાતે જમ્પિંગથી લઈને નાની રમતોમાં મુખ્યમંત્રી સાથે રહ્યા હતા અને બાળકોને ખૂબ મજા કરાવી હતી ફન બ્લાસ્ટમાં મુખ્યમંત્રી આજે આંગણવાડીનાં બાળકો સાથે સમય વિતાવવા પહોંચ્યા હતા. અહીં મુખ્યમંત્રી બાળકો સાથે અનેક પ્રકારની એક્ટિવિટીઓમાં જોડાયા હતા. ક્યાંક ટ્રેનમાં બેસીને મુખ્યમંત્રીએ નાના બાળકની જેમ રમતનો આનંદ માણ્યો, તો ક્યાંક અધિકારીઓ સાથે બાળક બનીને હળવી મજાક કરી.
સોશિયલ મીડિયા પ્લેટફોર્મ પર પોસ્ટ કરતા ભૂપેન્દ્ર પટેલે લખ્યું કે, બાળકોની કાલીઘેલી ભાષા.. તેમની આંખોમાં જોવા મળતું વિસ્મય.. દેશ દુનિયા અંગે જાણવાની તેમની જીજ્ઞાસા.. આ અનુભવ મારા માટે અવિસ્મરણીય બની રહેશે. ભારતીય જનતા પાર્ટીના કર્મઠ કાર્યકરો આ પહેલ હેઠળ જુદા જુદા વિસ્તારોમાં જઈ બાળકોના જુના રમકડા એકત્રિત કરીને આંગણવાડીઓના બાળકોને આપવાની સેવા પ્રવૃત્તિ કરે છે. તમારા બાળક ન રમતા હોય તેવા જૂના રમકડા તમે પણ આંગણવાડીના બાળકોને ચોક્કસ આપશો.
વધુમાં કહ્યું કે, આ નાનકડા ફૂલોના મુખ પર જોવા મળતું સ્મિત એ બહુ મોટી મૂડી છે. તેનું મૂલ્ય આંકી શકાય એમ નથી. બાળક સાથે સમય વિતાવ્યાં બાદ તેમણે આ અનુભવ શેર કર્યો હતો. સીએમ ભૂપેન્દ્ર પટેલે અનેક વખત આવા કાર્યક્રમોમાં જતા જોવા મળતા હોય છે. આજે પણ મુલાકાતની તસવીરો વાયરલ થઈ રહી છે.