અમદાવાદ : શહેરના જુના વાડજ વિસ્તારમાં આવેલ રામાપીરના ટેકરા પર વાડજ પોલીસની ટીમે દરોડો પાડીને ગેસના સિલિન્ડરમાંથી ગેસની ચોરી કરતા ગેસ રિફિલિંગ કરવાનું કૌભાંડ ઝડપી પાડયું છે. વાડજ પોલીસની ટીમે સ્થળ પરથી ગેસ રીફીલિંગના સાધનો અને ગેસની નાની મોટી 21 રીફીલની બોટલો સહિત બે આરોપીઓની ધરપકડ કરી હતી.
પ્રાપ્ત રિપોર્ટ મુજબ, જુના વાડજ વિસ્તારમાં રામાપીરના ટેકરા સેક્ટર 5 પાછળ ખુલ્લી જગ્યામાં બે શખ્સ ઘર વપરાશના ગેસના બાટલામાંથી ગેરકાયદેસર રીતે ઘર વપરાશના ગેસના બાટલામાં ગેસ રિફિલિંગ કરતા હોવાની પોલીસ ઇન્સ્પેક્ટર વી આર ડાંગરને બાતમી મળી હતી. જેના આધારે પોલીસે દરોડો પાડતા મયુર રાવત (રહે. રામ કોલોની, નવા વાડજ) અને કાનજી પરમાર (રહે. ભરવાડવાસ, નવા વાડજ)ને ઝડપી લીધા હતા.
સ્થળ પરથી પોલીસને 21 ગેસ સિલિન્ડર મળી આવ્યા હતા.બંને શખ્સો એક સિલિન્ડરમાંથી ખાલી ગેસ સિલિન્ડરમાં ગેસ ટ્રાન્સફર કરી રહ્યા હતા. પોલીસને આરોપીઓ પાસેથી ગેસ સિલિન્ડરનું બુકીંગ ધરાવતા 19 ગ્રાહકોની બુકીંગ સ્લીપ પણ મળી હતી. જેથી પોલીસે તમામ ગેસની બોટલો સહિત 93,280 નો મુદ્દામાલ જપ્ત કર્યો હતો. તેમજ વાડજ પોલીસે મયુર રાવત અને કાનજી ઉર્ફે બળવંત પરમાર સામે ગુનો નોધી વધુ તપાસ હાથ ધરી છે.
તમને જણાવી દઈએ કે વાડજમાં આવેલી ગેસ એજન્સીમાંથી ગ્રાહકોને ડીલેવરી થાય તે પહેલા સિલિન્ડરનું સીલ તોડીને તેમાંથી બે થી ત્રણ કિલો ગેસની ચોરી કરીને ડુપ્લીકેટ સીલ ફરીથી લગાવી દેતા હતા. આમ ગ્રાહકો સાથે છેતરપિંડી કરીને ચોરી કરેલો ગેસ ખાલી સિલિન્ડરમાં ભરીને બજારમાં બમણી કિંમતે વેચાણ કરતા હતા.