અમદાવાદ : શહેરના મણિનગર વિસ્તારમાં આવેલી દૂર્ગા સ્કૂલમાં એક ચોંકાવનારી ઘટના સામે આવી છે. ધોરણ 6 માં અભ્યાસ કરતા એક વિદ્યાર્થીએ તેના જ મિત્રની પાણીની બોટલમાં કેમિકલયુક્ત ગોળીઓ નાખી દેતા ખળભળાટ મચી ગયો છે. કેમિકલવાળું પાણી પીતા જ વિદ્યાર્થીની તબિયત લથડી હતી, જેને પગલે તાત્કાલિક હોસ્પિટલ ખસેડવામાં આવ્યો હતો.
પ્રાપ્ત રિપોર્ટ મુજબ, મણિનગર વિસ્તારમાં આવેલી દૂર્ગા સ્કૂલમાં રિસેસના સમયે એક વિદ્યાર્થીએ તેના મિત્રની બોટલમાં કેમિકલની ગોળીઓ ભેળવી દીધી હતી. જ્યારે બીજો વિદ્યાર્થી પાણી પીવા ગયો ત્યારે તેને વિચિત્ર ગંધ આવી હતી. તેણે અન્ય મિત્રોને પણ પાણી સૂંઘાડ્યું હતું, પરંતુ થોડું પાણી પી લેતા તેની તબિયત બગડી હતી અને તે બેભાન જેવી સ્થિતિમાં આવી ગયો હતો.
ઘટનાની ગંભીરતા જોતા વિદ્યાર્થીને તરત જ સારવાર માટે હોસ્પિટલ લઈ જવામાં આવ્યો હતો. ડોક્ટરો દ્વારા તપાસ બાદ વિદ્યાર્થીની તબિયત સ્થિર હોવાનું જાણવા મળ્યું. વિદ્યાર્થીને સારવાર બાદ ઘરે મોકલી દેવામાં આવ્યો હતો. જ્યારે ગોળી નાખનાર વિધાર્થીને આગામી દિવસોમાં શાળાએ હાજર ન રહેવા સૂચના આપવામાં આવી છે.
ગોળીઓ નાખનાર વિદ્યાર્થીને હાલ શાળામાંથી રજા પર ઉતારી દેવામાં આવ્યો છે.બંને વિદ્યાર્થીઓ અગાઉ દીવાન બલ્લુભાઈ સ્કૂલમાં સાથે હતા. તેમની વચ્ચે કોઈ મોટો ઝઘડો હોવાનું હાલ બહાર આવ્યું નથી. આ ઘટના બાદ શાળાએ વિદ્યાર્થીઓના બેગ ચેક કરવાનું શરૂ કર્યું છે. જો કોઈ બાળકને દવા લેવાની હોય તો વાલીઓએ હાજર રહેવું પડશે તેવી કડક સૂચના અપાઈ છે.