અમદાવાદ : આવતીકાલે એટલે આગામી 8મી માર્ચ, 2026ના રોજ અમદાવાદના નરેન્દ્ર મોદી સ્ટેડિયમ ખાતે ભારત અને ન્યૂઝીલેન્ડ વચ્ચે ICC T-20 વર્લ્ડકપ-2026ની હાઈવોલ્ટેજ ફાઈનલ મેચ રમાવાની છે. આ ઐતિહાસિક મુકાબલાને લઈને ક્રિકેટ પ્રેમીઓમાં ભારે ઉત્સાહ જોવા મળી રહ્યો છે. જોકે, આ ઉત્સાહનો ગેરફાયદો ઉઠાવીને ટિકિટોનું કાળાબજાર કરતા તત્ત્વો સામે પોલીસ અત્યારે એક્શન મોડમાં આવી છે.
પ્રાપ્ત રિપોર્ટ મુજબ, અમદાવાદના ચાંદખેડા વિસ્તારમાં LCB ઝોન-2ની ટીમ જ્યારે પેટ્રોલીંગમાં હતી, ત્યારે તેમને ચોક્કસ બાતમી મળી હતી કે મોટેરા સ્ટેડિયમ પાસે એક શખ્સ ઓનલાઇન બુક કરેલી ટિકિટો અત્યંત ઊંચા ભાવે વેચી રહ્યો છે. આ બાતમીના આધારે પોલીસે તાત્કાલિક વોચ ગોઠવી હતી અને સ્ટેડિયમ બહારથી જ આરોપીને કાળાબજાર કરતા રંગેહાથ ઝડપી લીધો હતો.અને કાળાબજારના આ નેટવર્કમાં અન્ય કોઈ સામેલ છે કે કેમ તે દિશામાં તપાસ તેજ કરી છે.
પોલીસ તપાસમાં પકડાયેલા આરોપીની ઓળખ વાસણામાં રહેતા વંશ હિરલકુમાર શાહ તરીકે થઈ છે. પોલીસે આરોપી પાસેથી ભારત અને ન્યૂઝીલેન્ડ વચ્ચેની ફાઈનલ મેચની કુલ 2 ટિકિટો જપ્ત કરી છે. ચોંકાવનારી વિગત એ સામે આવી છે કે, આ શખ્સ માત્ર 2,000ની મૂળ કિંમત ધરાવતી એક ટિકિટ 11,000ની અધધ કિંમતે વેચીને ક્રિકેટ પ્રેમીઓને લૂંટી રહ્યો હતો. આ બાબતે મહત્ત્વની કાર્યવાહી કરતા ચાંદખેડા પોલીસે આરોપી સામે ગુનો નોંધી વધુ તપાસ હાથ ધરી છે.