અમદાવાદ : શહેરમાં જાહેર શાંતિ અને સલામતી જળવાઈ રહે તેમજ અવાજનું પ્રદૂષણ અટકે તે હેતુથી અમદાવાદ પોલીસ કમિશનર જી.એસ. મલિક દ્વારા ભારતીય નાગરીક સુરક્ષા સંહિતા-2023ની કલમ-163 અન્વયે એક મહત્વનું જાહેરનામું બહાર પાડવામાં આવ્યું છે. આ હુકમ સમગ્ર અમદાવાદ શહેર પોલીસ કમિશનરની હકુમત હેઠળના વિસ્તારમાં અમલી રહેશે.
અમલીકરણનો સમયગાળો
આ જાહેરનામું તા. 06/03/2026ના કલાક 00:00 થી તા. 04/05/2026ના કલાક 24:00 સુધી એટલે કે કુલ 60 દિવસ માટે અમલમાં રહેશે.
મુખ્ય પ્રતિબંધો અને નિયમો
રાત્રિના સમયે પ્રતિબંધ: રાત્રિના 22:00 થી સવારના 06:00 વાગ્યા સુધી હોર્ન વગાડવા, ફટાકડા ફોડવા, લાઉડસ્પીકર કે વાજીંત્રો વગાડવા તેમજ ધ્વનિ પ્રદૂષણ પેદા કરતા બાંધકામના સાધનોના ઉપયોગ પર સંપૂર્ણ પ્રતિબંધ છે.
શાંત વિસ્તાર (Silence Zone): હોસ્પિટલો, શૈક્ષણિક સંસ્થાઓ, અદાલતો અને ધાર્મિક સ્થળોની આસપાસના 100 મીટરના વિસ્તારને ‘શાંત વિસ્તાર’ ગણવામાં આવશે, જ્યાં માઈક સિસ્ટમનો ઉપયોગ કરી શકાશે નહીં.
પરવાનગીની શરતો: જાહેર જગ્યાઓ પર માઈક સિસ્ટમ કે વાજીંત્રો વગાડવા માટે અધિકૃત પોલીસ અધિકારીની પૂર્વ લેખિત મંજૂરી લેવી ફરજિયાત છે. આ માટે કાર્યક્રમના 7 દિવસ પહેલા અરજી કરવાની રહેશે.
ઉશ્કેરણીજનક ગીતો પર રોક: માઈક સિસ્ટમમાં કોમી લાગણી દુભાય કે ઉશ્કેરણી થાય તેવા ગીતો કે ઉચ્ચારણો પર પ્રતિબંધ છે.
બંધ સ્થળો માટે નિયમ: ઓડિટોરીયમ કે કોન્ફરન્સ હોલ જેવા બંધ સ્થળોએ માઈક વગાડી શકાશે, પરંતુ તેનો અવાજ બહાર જવો જોઈએ નહીં.
ધ્વનિની મર્યાદા (ડેસીબલ)
જાહેરનામા મુજબ વિવિધ વિસ્તારો માટે અવાજની મર્યાદા નક્કી કરવામાં આવી છે:
રહેણાંક વિસ્તાર: દિવસ (55 dB) / રાત્રિ (45 dB)
વાણિજ્ય વિસ્તાર: દિવસ (65 dB) / રાત્રિ (55 dB)
ઔદ્યોગિક વિસ્તાર: દિવસ (75 dB) / રાત્રિ (70 dB)
શાંત વિસ્તાર: દિવસ (50 dB) / રાત્રિ (40 dB)
નિયમભંગ બદલ કાર્યવાહીઆ જાહેરનામાનો ભંગ કરનાર વ્યક્તિ સામે ભારતીય ન્યાય સંહિતા-2023ની કલમ-223 મુજબ ગુનો નોંધી કાયદેસરની કાર્યવાહી કરવામાં આવશે. પોલીસ અધિકારીઓને નિયમભંગ કરનારના વાહનો અને માઈક સિસ્ટમ જેવા સાધનો જપ્ત કરવાની સત્તા આપવામાં આવી છે.