અમદાવાદ: સોશિયલ મીડિયા મારફતે થયેલી મિત્રતા અનેક લોકો માટે મુશ્કેલીનો પહાડ બની હોય તેવા કિસ્સાઓ આપણી સામે અવારનવાર સામે આવતા છે. છતાં પણ લોકો ક્યાંક લાલચ, ધાક ધમકી કે પ્રેમમાં અજાણ્યા લોકો પર વિશ્વાસ મૂકી છે. આવું જ કંઈક અમદાવાદમાં રહેતી એક સગીરા સાથે બન્યું છે, જે દુષ્કર્મનો શિકાર બન્યા બાદ હાલ તેનો વીડિયો પણ સોશિયલ મીડિયામાં વાયરલ થયો છે. આ મામલે પોલીસ ફરિયાદ નોંધાતા પોલીસે મુખ્ય આરોપીની ધરપકડ કરી છે, જોકે સમાજ માટે ફરી એક વાર આંખ ઉઘાડતો કિસ્સો બની ગયો છે.
પ્રાપ્ત રિપોર્ટ મુજબ, પોલીસે પકડેલા આ શખ્સનું નામ દિવ્યેશ પારેખ છે, 17 વર્ષની સગીરાને કેફી પીણું પીવડાવી બેહોશ કરી તેની પર દુષ્કર્મ ગુજારવાના ગુનામાં આરોપીની ધરપકડ કરાઈ છે, જોકે આ કેસ સામુહિક દુષ્કર્મ તરીકે પોલીસ જોઈ રહી છે, કારણ કે સગીરાની સાથે આરોપીએ દુષ્કર્મ ગુજાર્યું ત્યારે ભોગ બનનારી સગીરા મિત્રે પણ તેના શરીરના ગુપ્ત ભાગો પર હાથફેરો કર્યો હતો, તેમજ આખી ઘટનાનો વીડિયો પોતાના ફોનમાં રેકોર્ડ કર્યો હતો. જોકે તે વીડિયો વાયરલ ન થયો હોત તો આ ઘટના અંગે ભોગ બનનાર કે પોલીસને જાણ પણ ના થઈ હોત.
સમગ્ર ઘટનાની શરૂઆતથી વાત કરીએ તો, રાણીપ વિસ્તારમાં રહેતી 17 વર્ષીય સગીરાને ઈન્સ્ટાગ્રામ મારફતે કલોલની 14 વર્ષની સગીરા સાથે મિત્રતા થઈ હતી, જે કલોલની સગીરા ભોગ બનનાર સગીરાને 31મી ડિસેમ્બરની પાર્ટી કરવા માટે માઉન્ટ આબુ લઈ ગઈ હતી, ત્યાં કલોલની સગીરા સાથે તેનો મિત્ર દિવ્યેશ પારેખ અને અન્ય ચાર યુવકો પણ ગયા હતા. તમામ મિત્રોએ દારૂ પાર્ટી શરૂ કરી ત્યારે કલોલની સગીરાએ ભોગ બનનાર સગીરાને અલગ રૂમમાં પાર્ટી કરવાનું કહી બંને સગીરા અને દિવ્યેશ પારેખ અલગ રૂમમાં ગયા હતા તે દરમિયાન ભોગ બનનાર સગીરાને કેફી પીણામાં નશા કારક પદાર્થ પીવડાવતા બેહોશ જેવી થઈ ગઈ હતી જેનો લાભ ઉઠાવી દિવ્યેશ પારેખે તેની સાથે દુષ્કર્મ ગુજાર્યું હતું અને 14 વર્ષની સગીરાએ તેને શારીરિક અડપલાં કર્યા હતા અને સાથે જ તેનો વિડીયો પણ પોતાના ફોનમાં રેકોર્ડ કર્યો હતો.
સગીરા જ્યારે ભાનમાં આવી ત્યારે તેને પોતાની સાથે કંઈક અજુગતું થયું હોવાનું લાગ્યું હતું અને જે અંગે તેને દિવ્યેશ પારેખ અને તેની મિત્રને પૂછતા કોઈએ સરખો જવાબ ન આપતા તે એકલી ટ્રેનમાં અમદાવાદ આવી ગઈ હતી. જોકે ગત 11 મી માર્ચના રોજ સગીરાની કલોલ ખાતે રહેતી અન્ય એક મિત્રએ તેને ઈન્સ્ટાગ્રામ પર ફોન કરી તેનો સેક્સ વીડીયો વાયરલ થયો હોવાની જાણ કરી વિડીયો મોકલ્યો હતો. જે વિડિયો જોતાની સાથે જ સગીરાના હોશ ઉડી ગયા હતા અને તેને માઉન્ટ આબુમાં બનેલી આખી ઘટનાની જાણ થઈ હતી. આ મામલે રાણીપ પોલીસ સ્ટેશનમાં 14 વર્ષની સગીરા અને 22 વર્ષના દિવ્યેશ પારેખ સામે પોક્સો અને આઇટી એક્ટ સહિતની કલમો હેઠળ ગુનો દાખલ કરાતા તપાસ SCST સેલને સોંપતા પોલીસે મુખ્ય આરોપીની ધરપકડ કરી છે અને 14 વર્ષની સગીરાની પૂછપરછ હાથ ધરી છે.
પોલીસની પ્રાથમિક તપાસમાં સામે આવ્યું કે પકડાયેલા આરોપી દિવ્યેશ પારેખ કલોલમાં હેર સલૂનની દુકાનમાં કામ કરે છે, અને 14 વર્ષની સગીરા ધોરણ 9 માં અભ્યાસ કરે છે. તેના પિતાનું અવસાન થયું છે અને એના દાદીની પેન્શન પર પરિવારનું ગુજરાન ચાલે છે. જોકે આટલી નાની ઉમરે આ પ્રકારના ગંભીર ગુનાને અંજામ આપવા બાબતે હવે પોલીસ માઉન્ટ આબુ ફરવા ગયેલા તમામ મિત્રોની પૂછપરછ કરી રહી છે, સગીરા સાથે અન્ય કોઈ મિત્રએ દુષ્કર્મ કર્યું છે કે કેમ તેની પણ તપાસ કરાવી રહી છે. વધુમાં પોલીસે પકડાયેલા આરોપીને કોર્ટમાં રજૂ કરી પાંચ દિવસના રિમાન્ડ મેળવવાની કાર્યવાહી પણ હાથ ધરી છે.