અમદાવાદ : અમદાવાદમાં એક બાજુ ગેસની અછત ચાલી રહી છે ત્યારે ગોમતીપુર વિસ્તારમાંથી 9 ભરેલા ગેસના બોટલની ચોરીના બનાવ સામે આવ્યો છે. ગેસના બાટલા ડિલિવરી કરતી જતી વખતે લોડીંગ રિક્ષામાંથી બાટલા ચોરાઈ ગયા હોવાનું સામે આવ્યું છે. ગેસ એજન્સીકર્મીએ ગોમતીપુર પોલીસ સ્ટેશનમાં અજાણ્યા ચોર સામે ફરિયાદ નોધાવતા પોલીસે તપાસ શરૂ કરી છે.
પ્રાપ્ત રિપોર્ટ મુજબ, મેઘાણીનગરમાં રહેતા 60 વર્ષીય ઉમાશંકર વર્મા કેરોલ ગેસ સર્વિસમાં નોકરી કરે છે અને ગોડાઉનમાં ઇન્ડેન ગેસના બાટલાની આવક તથા જાવકનો હિસાબ રાખવાનુ કામકાજ ગોમતીપુર છીકણીવાળા ચેમ્બર ખાતેથી કરે છે. તેમના વાંચ ખાતેના ગોડાઉનમાં 17 માણસો કામ કરે છે. ફેબ્રુઆરી મહિનામાં ગોડાઉનમાં કામ કરતો ડિલિવરી બોયે તેમને જણાવ્યું કે, બપોરના સમયે ગોમતીપુરમાં ગેસના બાટલાની ડિલિવરી કરવા ગયો હતો ત્યારે લોડીંગ રિક્ષામાં 3 ગેસના ભરેલા બોટલ કોઈએ ચોરી કરી લીધા છે.
ત્યારબાદ 26 ફેબ્રુઆરીના રોજ બીજા ડિલિવરી બોયે તેમને જણાવ્યું કે ગોમતીપુરમાં ઉષા રોડ પાસે આવેલી સુવાપંખીની ચાલીમાં ગેસના બોટલની ડિલિવરી કરવા ગયો હતો ત્યારે લોડિંગ રિક્ષામાંથી ગેસના ભરેલા 4 બોટલ પણ ચોરાઈ ગયા હતા. બાદમાં ઉમાશંકર ભાઈને તેમના ત્રીજા ડિલિવરી બોયે જણાવ્યું કે ગત 13 માર્ચના રોજ ગોમતીપુર હોજવાળી મસ્જિદ ખાતે ગેસના બોટલની ડિલિવરી કરવા ગયો હતો. ત્યારે પણ મારી લોડિંગ રિક્ષામાં રહેલા ભરેલા ગેસના 2 બોટલ ચોરી થઇ ગયા હતા.
મેઘાણીનગરમાં ગેસની એજન્સીનું ગોડાઉન ગોમતીપુર વિસ્તારમાં આવેલું છે અને ત્યાંથી ડિલિવરી બોય રોજેરોજ લોડિંગ રિક્ષામાં ગેસના ભરેલા બોટલ લઈને ડિલિવરી કરવા માટે જતા હોય છે. ગત ફેબ્રુઆરીથી 13 માર્ચ સુધીના ટૂંકા ગાળામાં કુલ 9 ગેસના ભરેલા બોટલ ચોરાઈ ગયા છે. આ મામલે ગેસ એજન્સીના કર્મચારીએ પોલીસ ફરિયાદ નોંધાવતા તપાસનો દોર શરૂ કરવામાં આવ્યો છે.