અમદાવાદ : મિડલ ઈસ્ટમાં યુદ્ધ ચાલી રહ્યું છે. જેને લીધે પેટ્રોલ અને ગેસનો જથ્થો દેશમાં ઓછો હોવાથી તેની અછત જેવી સ્થિતિ સર્જાઈ છે. સર્જાયેલી ગેસની અછત વચ્ચે શહેરના થલતેજમાં ઘરેલું ગેસના બોટલમાંથી ગેસ કાઢીને ખાલી બોટલમાં ભરીને વેચનાર ગેસ એજન્સીનો ડિલિવરી કરનાર કર્મચારી ઝડપાયો છે. બોડકદેવ પોલીસે આરોપીની ધરપકડ કરી વધુ તપાસ હાથ ધરી છે.
મળતી માહિતી મુજબ, બોડકદેવ પોલીસની ટીમ પેટ્રોલિંગમાં હતી ત્યાર બાતમી મળતા થલતેજ ગામમાં ભરવાડ વાસ પોલીસ પહોંચી હતી. અહીં જાહેરમાં એક વ્યક્તિ ગેસની ભરેલી બોટલમાંથી ખાલી બોટલ ભરતો હતો. જેથી પોલીસે વ્યક્તિની પૂછપરછ કરી ત્યારે તેનું નામ હીરા પરમાર હોવાનું જાણવા મળ્યું હતું. હીરા પરમાર પાસેથી 7 ગેસના બોટલ, રિક્ષા, ગેસ ભરવાની પાઇપ સહિતનો મુદ્દામાલ કબ્જે કરવામાં આવ્યો હતો.
પોલીસને તપાસ દરમિયાન જાણવા મળ્યું કે, આરોપી હીરા પરમાર આંબાવાડીની સંતોષ ગેસ એજન્સીમાં ડિલિવરી મેન તરીકે કામ કરે છે. તે કસ્ટમરને આપવાના 5 અલગ-અલગ ભરેલા સિલિન્ડરમાંથી થોડો-થોડો ગેસ ચોરી કરતો અને તેને ખાલી બોટલમાં ભરીને ઊંચા ભાવે વેચી દેતો હતો. આ રીતે તે ગ્રાહકોને ઓછો ગેસ આપીને વધારાના પૈસા કમાવાની લાલચમાં કાળાબજારી કરતો હતો.
ઉલ્લેખનીય છે કે, પોલીસે ઘટનાસ્થળેથી 7 ગેસ સિલિન્ડર, ગેસ ટ્રાન્સફર કરવાની પાઇપ, વજન કાંટો, રિક્ષા અને ડિલિવરીની રસીદો સહિતનો તમામ મુદ્દામાલ જપ્ત કર્યો છે. હાલ બોડકદેવ પોલીસે આરોપી વિરુદ્ધ ગુનો નોંધી તેની ધરપકડ કરી છે અને આ કૌભાંડમાં અન્ય કોઈની સંડોવણી છે કે કેમ તે દિશામાં વધુ તપાસ હાથ ધરી છે.