અમદાવાદ : અમદાવાદ સહિત સમગ્ર ગુજરાતમાં CNG ના ભાવમાં પણ તોતિંગ વધારો ઝીંકવામાં આવ્યો છે. CNG મોંઘો થતાં જ અમદાવાદ રિક્ષા ચાલક એક્તા યુનિયન દ્વારા રિક્ષાના ન્યૂનતમ અને પ્રતિ કિલોમીટરના ભાડામાં વધારો કરવા માટે સરકાર સમક્ષ ઉગ્ર માંગ એક ઉગ્ર વિરોધ પ્રદર્શનનું આયોજન કરવામાં આવ્યું હતું. જેને પગલે હવે સામાન્ય મુસાફરોની ખિસ્સા ખાલી થવાની ચિંતા વધી ગઈ છે.
રિપોર્ટ મુજબ, ઓઈલ કંપનીઓ દ્વારા સીએનજીના ભાવમાં પ્રતિ કિલોએ રૂપિયા 2.25 નો સીધો વધારો કરી દેવામાં આવ્યો છે. આ નવા વધારા બાદ હવે અમદાવાદમાં સીએનજીનો નવો ભાવ પ્રતિ કિલોના રૂપિયા 86.02 પર પહોંચી ગયો છે. ભાવ વધારાના કારણે રિક્ષાચાલકોની રોજિંદી કમાણી પર સીધી અને મોટી અસર પડી રહી છે, જેથી તેઓ પોતાના વ્યવસાયને ટકાવી રાખવા માટે ભાડું વધારવા મજબૂર બન્યા હોવાનું જણાવી રહ્યા છે.
અદાણી CNGના ભાવમાં વધારો હવે ભાડામાં પણ વધારો કરવાની વિચારણા ચાલી રહી છે. ટ્રાન્સપોર્ટ કમિશનર અને વાહન વ્યવહાર મંત્રી હર્ષ સંઘવીને ભાડામાં વધારો કરવામાં આવે તેવી રજૂઆત કરવામાં આવી છે. રેગ્યુલર ભાડા(મિટર વગર)માં રૂ. 20થી 30નો ભાવ વધારો અને એક કિલોમીટર ભાડામાં 15થી 20 રૂપિયા સુધીનો વધારો કરવા માટે માગ કરવામાં આવી છે.
રિક્ષાચાલક સંગઠનો દ્વારા સરકાર સમક્ષ એવી માંગ મૂકવામાં આવી છે કે, વર્તમાન મોંઘવારી અને સીએનજીના નવા ભાવને ધ્યાનમાં રાખીને રિક્ષા ભાડામાં પ્રતિ કિલોમીટર દીઠ રૂપિયા 5 નો વધારો મંજૂર કરવામાં આવે. જો સરકાર દ્વારા આ માંગ સ્વીકારવામાં આવશે, તો આગામી દિવસોમાં મુસાફરોએ રિક્ષામાં મુસાફરી કરવા માટે પહેલા કરતાં વધુ ભાડું ચૂકવવું પડશે. હાલમાં આ દરખાસ્ત સરકારના વિચારાધીન છે અને તેના પર ટૂંક સમયમાં જ આખરી નિર્ણય લેવાય તેવી શક્યતા છે.