અમદાવાદ : શહેરના સોલા હાઇકોર્ટ પોલીસ સ્ટેશન દ્વારા આંતરજિલ્લા ચોરીના બે અલગ અલગ ગુનાઓનો ભેદ ઉકેલી એક આરોપી અને કાયદાના સંઘર્ષમાં આવેલા એક બાળ કિશોરને ઝડપી પાડવામાં સફળતા મળી છે. પોલીસે આરોપીઓ પાસેથી ચોરાયેલ એક્ટિવા અને રોકડ રકમ મળી કુલ રૂ. 23 હજારનો મુદ્દામાલ કબ્જે કર્યો છે.
રિપોર્ટ મુજબ, સોલા હાઇકોર્ટ પોલીસ સ્ટેશનના PSI એન.એસ.સિંહની આગેવાનીમાં પોલીસની ટીમ પેટ્રોલિંગમાં હતા. તે દરમિયાન મળેલી બાતમીના આધારે એસ.જી. હાઇવે પર અમેઝ માર્બલ ત્રણ રસ્તા નજીકથી સાહીલ કાળુજી ઠાકોર (ઉ.વ.22, રહે. સોલા ગામ, અમદાવાદ) તથા એક બાળ કિશોરને ઝડપી પાડવામાં આવ્યા હતા.
તપાસ દરમિયાન સામે આવ્યું કે આરોપીઓએ અડાલજ વિસ્તારમાંથી તા. 7 મેના રોજ વૈષ્ણવદેવી સર્કલ પાસે પાર્ક કરાયેલ હોન્ડા એક્ટિવા નંબર GJ-01-NC-4091નું લોક તોડી ચોરી કરી હતી. ઉપરાંત વિરમગામ ટાઉન વિસ્તારમાં અરવા ટેલિકોમ દુકાનમાંથી રોકડ ભરેલું પાકીટ ચોરી કરવાની ઘટનામાં પણ તેમની સંડોવણી બહાર આવી હતી.
પોલીસે આરોપીઓ પાસેથી રૂ. 15 હજાર કિંમતનું એક્ટિવા અને રૂ. 8 હજાર રોકડ મળી કુલ રૂ. 23 હજારનો મુદ્દામાલ કબ્જે કર્યો છે. તપાસમાં મુખ્ય આરોપી સામે ગાંધીનગર, કલોલ અને પાલનપુર સહિતના પોલીસ સ્ટેશનોમાં અગાઉના ગુનાઓ નોંધાયેલા હોવાનું પણ બહાર આવ્યું છે.હાલ પોલીસે આ મામલે ગુનો નોંધીને આગળની તપાસ અને અન્ય સાગરીતોની શોધખોળ હાથ ધરી છે.