અમદાવાદ : અમદાવાદ મ્યુનિસિપલ કોર્પોરેશન (AMC) ની હદની બહાર ફાયર અને ઇમરજન્સી સર્વિસના દરમાં કરવામાં આવેલા ધરખમ વધારાને લઈને શહેરભરમાં ચર્ચાઓ શરૂ થઈ છે. આ નિર્ણયો ખાસ કરીને મ્યુનિસિપલ હદની બહારની સેવાઓ માટે લેવામાં આવ્યા છે, જેનાથી નાગરિકો અને ઉદ્યોગો પર આર્થિક બોજ વધશે.
રિપોર્ટ મુજબ, સ્ટેન્ડિંગ કમિટીના ચેરમેન કમલેશ પટેલે આ અંગે વિગતો આપતાં જણાવ્યું હતું કે, “અમદાવાદ શહેરની અંદર બનતી કોઈપણ આકસ્મિક ઘટનામાં નાગરિકો પાસેથી કોઈ જ પ્રકારનો ચાર્જ લેવામાં આવતો નથી.પરંતુ મ્યુનિસિપલ હદની બહાર ફાયર અને રેસ્ક્યુ વાહનોની સેવા લેવા માટે નાગરિકોએ જૂના ₹1,000ના બદલે ₹1,600 ચૂકવવા પડશે. આ ઉપરાંત, આગ હોલવવા માટે જરૂરી B.A. સિલિન્ડરના વપરાશનો ચાર્જ પણ ₹100થી ત્રણ ગણો વધારીને ₹300 કરી દેવામાં આવ્યો છે. આ સુધારાઓ દ્વારા ફાયર વિભાગ તેની સેવાઓના સંચાલન ખર્ચને પહોંચી વળવા માટે વધુ આર્થિક સધ્ધરતા લાવવાનો પ્રયાસ કરી રહ્યું છે.
આ નવી નીતિમાં સૌથી નોંધપાત્ર બાબત કેમિકલ અને ગેસ લીકેજ જેવી ગંભીર સ્થિતિઓ માટે અલગથી ચાર્જ વસૂલવાનો નિર્ણય છે, જે અગાઉ સ્પષ્ટ નહોતો. આ ઉપરાંત, હવે ફાયર સેવા દરમિયાન ઉપયોગમાં લેવાતા સ્ટાફનું ભથ્થું અને ઇંધણનો ખર્ચ પણ અલગથી વસૂલવામાં આવશે. ફાયર સિલિન્ડર અને રેસ્ક્યુ વાહનોના ભાડામાં થયેલા આ વધારા સાથે, હવે કોઈપણ કટોકટીના સમયે ફાયર બ્રિગેડની મદદ લેવી મોંઘી પડશે.
કોઈ આકસ્મિક ઘટના બને અને કોઈ જાગૃત નાગરિક (જેનો ઘટના સાથે સીધો સંબંધ નથી) ફાયર બ્રિગેડને ફોન કરીને સૂચના આપશે, તો તેને ‘બિનવારસદાર કોલ’ ગણીને તેની પાસેથી કોઈ ચાર્જ લેવાશે નહીં. જોકે, કંટ્રોલ રૂમમાં તે નાગરિકનું નામ, સરનામું અને મોબાઈલ નંબર નોંધવાનો રહેશે. ફાયરની ટીમ ઘટનાસ્થળે પહોંચ્યા બાદ જો અસલી વારસદાર કે મિલકત માલિકની ઓળખ થાય, તો કાયદા મુજબ ચાર્જ તે માલિક પાસેથી જ વસૂલવામાં આવશે.
વધુ વિગતો માટે AMCની સત્તાવાર વેબસાઇટ કે ફાયર વિભાગનો સંપર્ક કરી શકાશે. AMCનું આ પગલું વહીવટી સ્તરે ખર્ચ ઘટાડવા અને સેવાઓને વધુ વ્યવસ્થિત બનાવવા માટે લેવામાં આવ્યું હોવાનું તંત્ર દ્વારા જણાવાઈ રહ્યું છે. જોકે, આ વધારાને કારણે ખાનગી એકમો અને મ્યુનિસિપલ હદની બહાર સ્થિત વિસ્તારો પર મોટો આર્થિક બોજ પડશે તે નિશ્ચિત છે.