અમદાવાદ : અમદાવાદ શહેરના સોલા હાઇકોર્ટ પોલીસ સ્ટેશનની સર્વેલન્સ સ્કોડની ટીમે એક સરાહનીય કામગીરી કરીને છેલ્લા આઠેક માસથી પોતાની ધરપકડ ટાળવા માટે નાસતા ફરતા એક વોન્ટેડ આરોપીને પકડી પાડવામાં મોટી સફળતા મેળવી છે. પકડાયેલ આરોપી સોલા પોલીસ સ્ટેશન વિસ્તારમાં છેતરપિંડી અને વિશ્વાસઘાતના બે ગંભીર ગુનાઓમાં સંડોવાયેલો હતો.
રિપોર્ટ મુજબ, સોલા હાઈકોર્ટ પોલીસને મળેલી ચોક્કસ બાતમીના આધારે પોલીસ સબ ઇન્સ્પેક્ટર એસ.જે. દેસાઈ તથા તેમની ટીમે સોલા આર.સી. ટેકનિકલ રોડ પર વિવાંતા હોટલ સામે જાહેર માર્ગ પરથી આરોપીને ઝડપી પાડ્યો હતો. આરોપી સામે સોલા હાઈકોર્ટ પોલીસ સ્ટેશનમાં નોંધાયેલા છેતરપિંડીના બે ગુનાઓમાં કાર્યવાહી ચાલી રહી હતી અને તે પોતાની ધરપકડ ટાળવા માટે છેલ્લા આઠ મહિનાથી ફરાર હતો.
પકડાયેલ આરોપીની ઓળખ દક્ષિત ઉર્ફે રાજન ભગાભાઈ દેસાઈ (ઉંમર 30 વર્ષ), રહે. ચામુંડા નગર વિભાગ-2, ચાણક્યપુરી, ઘાટલોડિયા, અમદાવાદ તરીકે થઈ છે. તે વ્યવસાયે ડ્રાઈવર હોવાનું જાણવા મળ્યું છે. તેનો મૂળ વતન બિલિયા ગામ, તાલુકો સિદ્ધપુર, જિલ્લો પાટણ છે.આરોપી સામે સોલા હાઈકોર્ટ પોલીસ સ્ટેશનમાં વર્ષ 2025 અને 2026 દરમિયાન નોંધાયેલા બે ગુનાઓ વિવિધ કલમો હેઠળ ગુના દાખલ કરવામાં આવ્યા છે.
આ સફળ કામગીરીમાં પો.સ.ઇ. એસ.જે. દેસાઈ સહિત પોલીસ સ્ટાફના સભ્યોએ મહત્વપૂર્ણ ભૂમિકા ભજવી હતી. પોલીસે આરોપીની વધુ પૂછપરછ અને કાયદેસરની કાર્યવાહી હાથ ધરી છે.