અમદાવાદ : શહેરના નારણપુરા વિસ્તારમાંથી ઓનલાઈન સટ્ટા અને સાયબર ફ્રોડના મોટા રેકેટનો પર્દાફાશ થયો છે. ભાડેથી મકાન રાખીને પ્રતિબંધિત ઓનલાઇન ગેમિંગના નાણાં મ્યુલ એકાઉન્ટ મારફતે હેરફેર કરતી ગેંગ છ માસથી રેકેટ ચલાવતી હોવાનું સામે આવ્યું છે. ત્યારે હાલ દેશવ્યાપી કૌભાંડમાં નારણપુરા પોલીસે રાજસ્થાનના પાંચ શખ્સોની ધરપકડ કરી છે. પ્રતિબંધિત “REDDY ANNA” ઓનલાઈન ગેમિંગ પ્લેટફોર્મ અંગે ઊંડાણપૂર્વક તપાસ હાથ ધરી છે.
રિપોર્ટ મુજબ, નારણપુરા પોલીસને બાતમી મળી હતી કે, આદર્શનગરના એક મકાનમાં કેટલાંક રાજસ્થાનના લોકો ભાડેથી રહે છે અને ગેરકાયદે પ્રવૃતિ કરે છે. જેથી પોલીસે રેડ કરતા અહીં ઓનલાઇન ગેમીંગના નાણાંને મ્યૂલ એકાઉન્ટમાં ટ્રાન્સફર કરવાનું કૌભાંડ મળી આવ્યુ હતું.પોલીસે રેડ દરમિયાન રાજસ્થાનના વિશાલ બાલોટિયા, સચીન બોકોલીયા, સોનુ બડાલીયા, મુન્નારામ નવલ, છોટુરામ નવલ નામના પાંચ આરોપીઓની ધરપકડ કરી હતી.આ તમામ આરોપીઓ અહીં ગેરેજમાં કે અન્ય જગ્યાએ મજુરી કામ કરવાની સાથે “REDDY ANNA” નામની પ્રતિબંધિત એપ્લીકેશનમા ક્રિકેટ, ફુટબોલ જેવી ગેમ ઓનલાઇન રમાડવા માટે આઇડી બનાવી આપી નાણાં મેળવતા હતા.
વધુમાં તપાસમાં સામે આવ્યું છે કે, પકડાયેલા આ લોકો પ્રતિબંધિત “REDDY ANNA” નામની ગેમિંગ એપ પર ઓનલાઇન ગેમ રમાડતા હતા. “REDDY ANNA” નામની એપ્લિકેશનમાં તેઓ ક્રિકેટ, ફૂટબોલ જેવી ગેમ ઓનલાઇન રમાડવા માટે આઇડી બનાવી આપી નાણાં મેળવતા હતા. આ આઇડી ધારકો પાસેથી મેળવવામાં આવતા નાણાં વિવિધ મ્યૂલ એકાઉન્ટમાં જમા થતા હતા હોવાનું સામે આવ્યું છે. જેથી પોલીસે તમામ એકાઉન્ટ મામલે તપાસ શરૂ કરી છે.
હાલ આ મામલે પોલીસ બેંક એકાઉન્ટની વિગતો તપાસતા મળી આવેલ બેંક એકાઉન્ટ વિરુદ્ધ ગુજરાત, બિહાર, ઉત્તર પ્રદેશ અને આંધ્રપ્રદેશમાં છેતરપિંડીના કેસ નોંધાયા છે. જે એકાઉન્ટોમાં સાયબર ફ્રોડના નાણાં ટ્રાન્સફર થયા હતા. બીજી બાજુ અત્યાર સુધીમાં પ્રતિબંધિત ગેમિંગ એપ્લિકેશન માધ્યમથી કેટલા પૈસા મેળવ્યા છે અને કેટલા લોકો ગેમિંગ એપનો ઉપયોગ કરતા હતા તે દિશામાં પોલીસે તપાસ શરૂ કરી છે.