અમદાવાદ : અમદાવાદ શહેરમાં ગેરકાયદેસર પ્રવૃત્તિઓ અને નશાના કારોબાર સામે અમદાવાદ પોલીસે લાલ આંખ કરી છે. અમદાવાદના હબ ગણાતા એસ.જી. હાઈવે નજીક છારોડી વિસ્તારમાં આવેલા ‘એલીઝીયમ કાફે’ માં ધમધમતા ગેરકાયદેસર હુક્કાબાર પર સોલા હાઈકોર્ટ પોલીસે ઓચિંતા દરોડા પાડીને મોટા નેટવર્કનો પર્દાફાશ કર્યો છે. પોલીસે સ્થળ પરથી રૂ. 5,950નો મુદ્દામાલ જપ્ત કરીને બે આરોપીઓ સામે ગુનો નોંધી કાયદેસરની કાર્યવાહી હાથ ધરી છે.
રિપોર્ટ મુજબ, સોલા પોલીસને મળેલી બાતમીના આધારે સોલા છારોડી પ્રાચી ફાર્મ ખાતે આવેલા એલીઝીયમ કાફેમાં ગ્રાહકોને હર્બલ ફ્લેવરના નામે નિકોટિનયુક્ત તમાકુવાળા હુક્કા પીવડાવવામાં આવતા હોવાની માહિતી મળી હતી.પોલીસના દરોડા દરમિયાન કાફેમાં મોટાપાયે નિકોટીનયુક્ત તમાકુવાળા હુક્કા પીરસવામાં આવી રહ્યા હોવાનું રંગેહાથ ઝડપાયું હતું. પોલીસે ઘટનાસ્થળેથી મુદ્દામાલ જપ્ત કર્યો છે. જપ્ત કરવામાં આવેલા મુદ્દામાલમાં 7 નંગ ફેન્સી હુક્કા, ફિલ્ટર, પ્રતિબંધિત કેમિકલયુક્ત ફ્લેવર્સ અને હુક્કાબાર ચલાવવા માટે વપરાતી અન્ય ગુનાહિત સામગ્રીનો સમાવેશ થાય છે. આ આખી રેઇડ બાદ કાફે પરિસરમાં ગ્રાહકો અને સંચાલકો વચ્ચે ભારે નાસભાગ મચી ગઈ હતી.
પોલીસે આરોપી હાર્દિકકુમાર મોહનલાલ પ્રજાપતિ અને મેનેજર વિવેક રામસેવક શર્મા સામે કાયદેસરની કાર્યવાહી હાથ ધરી છે.પકડાયેલા બંને આરોપીઓ વિરુદ્ધ પ્રોહિબિશન અને સિગારેટ તેમજ અન્ય તમાકુ ઉત્પાદન પ્રતિબંધ અધિનિયમ હેઠળ ગુનો નોંધી ધરપકડની કાર્યવાહી કરવામાં આવી છે. અમદાવાદમાં મોડી રાત સુધી ચાલતા કાફે કલ્ચરની આડમાં નશાનો વેપાર કરતા તત્વો સામે આ કાર્યવાહીથી ફફડાટ વ્યાપી ગયો છે. સોલા હાઈકોર્ટ પોલીસે આ કાફેમાં નશાની સામગ્રી ક્યાંથી સપ્લાય થતી હતી તે દિશામાં વધુ તપાસ હાથ ધરી છે.