અમદાવાદ : અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીની દર ગુરૂવારની સાપ્તાહિક મિટીંગ અંતર્ગત આજે સ્ટેન્ડિંગ કમિટીની બેઠક યોજાઈ હતી. જેમાં શહેરના વિવિધ વિકાસલક્ષી કામો તેમજ મહાનગરપાલિકાને લગતા મહત્વના વિવિધ મુદ્દાઓ પર ચર્ચા-વિચારણા કરવામાં આવી હતી.
રિપોર્ટ મુજબ, આજે સ્ટેન્ડિંગ કમિટીની બેઠક બાદ ચેરમેનશ્રી કમલેશભાઈ પટેલે જણાવ્યું હતું કે, કોર્પોરેશનના હોલના બુકિંગ અંગેનો મુદ્દો સ્ટેન્ડિંગ કમિટી સમક્ષ આવ્યો હતો. હાલમાં લગ્નના હેતુથી કોર્પોરેશનનો હોલ બુક કરાવવા જતા નાગરિકો પાસેથી વર-વધૂના આધાર કાર્ડ, વર-વધૂના માતા-પિતાના આધાર કાર્ડ ઉપરાંત લગ્નની આમંત્રણ પત્રિકા પણ માંગવામાં આવતી હતી, જેના કારણે બુકિંગમાં મુશ્કેલી ઊભી થતી હતી. આ અંગે આજની સ્ટેન્ડિંગ કમિટીની બેઠકમાં સૂચના આપવામાં આવી છે કે હોલના બુકિંગ સમયે લગ્નની આમંત્રણ પત્રિકા માંગવામાં ન આવે. માત્ર વર-વધૂ તથા તેમના માતા-પિતાના આધાર કાર્ડના આધારે લગ્ન માટે હોલનું બુકિંગ કરી આપવામાં આવે.
વધુમાં ચેરમેનશ્રીએ જણાવ્યું હતું કે, વર્ષ 2018માં કોર્પોરેશનના હોલમાં લગ્ન સહિતના પ્રસંગો માટે ખાનગી ડેકોરેશન કોન્ટ્રાક્ટરોને કામગીરી સોંપવામાં આવતી હતી. આ કોન્ટ્રાક્ટરો હોલની સારસંભાળ, સુરક્ષા, મેઇન્ટેનન્સ, વીજળી સહિતના ખર્ચની જવાબદારી સંભાળતા હતા અને તેના બદલામાં હોલમાં યોજાતા પ્રસંગોનું ડેકોરેશન કરતા હતા. આ વ્યવસ્થાથી કોર્પોરેશનને આશરે વાર્ષિક રૂ.10 કરોડની આવક થતી હતી.
હાલમાં કોર્પોરેશનના હોલ અને પાર્ટી પ્લોટના સિક્યોરિટી, લાઇટ, ઇજનેર અને સફાઈ સહિતની વિવિધ કામગીરી પાછળ આશરે વાર્ષિક રૂ. 40 કરોડનો ખર્ચ થાય છે. વર્ષ 2018થી અગાઉની ડેકોરેશન કોન્ટ્રાક્ટની વ્યવસ્થા બંધ કરવામાં આવી હતી. હવે કોર્પોરેશન અને જાહેર જનતા બંનેને લાભ થાય તે હેતુથી હોલ અને પાર્ટી પ્લોટના ડેકોરેશન માટે નવી પોલિસી લાવવાની વિચારણા કરવામાં આવી રહી છે. આ અંતર્ગત ત્રણ પ્રકારના પેકેજ તૈયાર કરવામાં આવશે. ડેકોરેશનની કામગીરી માટે કોન્ટ્રાક્ટરો પાસેથી પ્રારંભિક માહિતી મંગાવવામાં આવી છે.