અમદાવાદ : અમદાવાદ શહેર પોલીસે રાજ્યના પોલીસ મહાનિર્દેશક (DGP)ના આદેશ બાદ અમદાવાદ પોલીસ કમિશનરની સૂચનાથી બે દિવસીય સ્પેશિયલ પ્રોહિબિશન ડ્રાઇવ હાથ ધરી હતી. આ ડ્રાઇવ અંતર્ગત શહેરના વિવિધ વિસ્તારો, ખાસ કરીને સોલા, સાબરમતી અને નરોડામાંથી, ગેરકાયદેસર દારૂનો મોટો જથ્થો ઝડપી પાડવામાં આવ્યો છે.પોલીસની આ આક્રમક કામગીરીના કારણે અસામાજિક તત્વો અને ગેરકાયદે રીતે દારૂનો વેપાર કરતા લોકોમાં ભારે ફફડાટ વ્યાપી ગયો છે.
રિપોર્ટ મુજબ, અમદાવાદ શહેર પોલીસ તંત્ર દ્વારા તારીખ 18 અને 19 ઓગસ્ટ દરમિયાન હાથ ધરવામાં આવેલી ડ્રાઈવમાં કુલ 215 જેટલા પ્રોહિબિશનના કેસ ચોપડે નોંધાયા છે. આ ગેરકાયદે પ્રવૃત્તિઓમાં સંકળાયેલા કુલ 244 આરોપીઓ વિરુદ્ધ કાયદેસરની કાર્યવાહી કરવામાં આવી છે. સમગ્ર કામગીરી દરમિયાન ભારતીય બનાવીના બનાવટી વિદેશી દારૂ અને બીયરના કુલ 47 મોટા કેસો શોધી કાઢવામાં પોલીસને સફળતા મળી છે. વિદેશી દારૂના કાસામાં પોલીસે ત્વરિત કાર્યવાહી કરીને વિદેશી દારૂ તથા બીયરની કુલ 10,885 બોટલો કબ્જે કરી છે. દારૂનો જથ્થો અને હેરફેર માટે વપરાયેલા વાહનો મળીને કુલ 77.87 લાખનો મુદ્દામાલ જપ્ત કરવામાં આવ્યો છે. આ ઉપરાંત દેશી દારૂના 168 કેસો શોધી કાઢીને 1,941 લીટર દારૂ કબ્જે કરાયો છે, જેમાં 4.26 લાખનો મુદ્દામાલ પોલીસના હસ્તગત થયો છે.અમદાવાદ પોલીસની બે દિવસની આ સઘન કાર્યવાહીથી ગેરકાયદેસર દારૂના વેપાર સાથે સંકળાયેલા તત્વોમાં ફફડાટ ફેલાયો છે.
અમદાવાદ શહેરના વિવિધ પોલીસ સ્ટેશનોમાં સોલા પોલીસે 2,762 બોટલ દારૂ અને બીયર સાથે 4 આરોપીઓને ઝડપી પાડ્યા હતા. સાબરમતી પોલીસે 1,740 બોટલ વિદેશી દારૂ સાથે એક શખ્સની અટકાયત કરી હતી. જ્યારે સૌથી મોટી કાર્યવાહી નરોડા પોલીસે કરી હતી, જ્યાં આયશર ટ્રક સહિત 3,840 બોટલ વિદેશી દારૂ જપ્ત કરીને 4 આરોપીઓની ધરપકડ કરવામાં આવી હતી અને 24.73 લાખનો મુદ્દામાલ કબ્જે કરાયો હતો. અમદાવાદ પોલીસે સ્પષ્ટ કર્યું છે કે, આવનાર દિવસોમાં પણ આવી કાર્યવાહી ચાલુ રહેશે.