અમદાવાદ : અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર કસ્ટમ્સ વિભાગે મોટી કાર્યવાહી કરીને સોનાની તસ્કરીનો પર્દાફાશ કર્યો છે. શારજાહથી આવેલી એક મહિલા મુસાફર પાસેથી રૂ. 83 લાખથી વધુની કિંમતનું સોનું જપ્ત કરવામાં આવ્યું છે. એરપોર્ટ પર સુરક્ષા તપાસ દરમિયાન મહિલાની શંકાસ્પદ હિલચાલને આધારે સઘન ચેકિંગ હાથ ધરવામાં આવ્યું હતું, જેમાં આ ગેરકાયદેસર સોનું પકડાયું હતું.કસ્ટમ્સ એક્ટ હેઠળ સોનાનો જથ્થો જપ્ત કરી મહિલા મુસાફરની ધરપકડ કરવામાં આવી હતી અને આ દાણચોરીના નેટવર્કના મૂળ સુધી પહોંચવા સઘન તપાસ શરૂ કરવામાં આવી છે.
રિપોર્ટ મુજબ, અમદાવાદ આવેલા મુસાફરો પર કસ્ટમ્સની AIU ટીમ વોચ રાખી રહી હતી. આ દરમિયાન શંકાસ્પદ જણાતાં એક મહિલા પેસેન્જરને અટકાવીને પૂછપરછ હાથ ધરવામાં આવી હતી. મહિલાની ઝીણવટભરી શારીરિક તપાસ કરતાં તેણે પહેરેલા હાઈ-નેક સ્વેટરના અંદરના ભાગમાં ચાલાકીપૂર્વક છુપાવી રાખેલી સોનાની ભારે ચેઈન મળી આવી હતી.
મૂળ ભાવનગરની 31 વર્ષીય આ મહિલા પોતાના હાઈ-નેક સ્વેટરમાં ખૂબ જ ચાલાકીપૂર્વક સોનાની ચેઈન છુપાવીને લાવી રહી હતી. કસ્ટમ્સ અધિકારીઓએ તપાસ કરતા તેની પાસેથી 24 કેરેટ શુદ્ધતા ધરાવતી 499.540 ગ્રામ સોનાની ચેઈન મળી આવી હતી. આ જપ્ત કરાયેલા સોનાની બજાર કિંમત આશરે રૂ. 83.14 લાખ આંકવામાં આવી છે.
કસ્ટમ્સ એક્ટની જોગવાઈઓ હેઠળ મહિલા ડોક્ટરની ધરપકડ કર્યા બાદ કાયદાકીય પ્રક્રિયા પૂર્ણ કરી તેને જામીન પર મુક્ત કરવામાં આવી હતી. આટલી મોટી કિંમતનું સોનું તે વિદેશમાં કોની પાસેથી લાવી હતી અને અમદાવાદમાં કોને પહોંચાડવાનું હતું તે દિશામાં કસ્ટમ્સ વિભાગે ઊંડાણપૂર્વક તપાસ હાથ ધરી છે.