અમદાવાદ : નવા વાડજ ખાતે આવેલી લાયોનેસ કર્ણાવતી એમ.એચ. હિન્દી હાયર સેકન્ડરી સ્કૂલમાં આજે શિક્ષક દિવસની અનોખી અને પ્રેરણાદાયી ઉજવણી કરવામાં આવી હતી. શિક્ષકો પ્રત્યે કૃતજ્ઞતા અને સન્માન વ્યક્ત કરવાના હેતુથી યોજાયેલા આ કાર્યક્રમમાં વિદ્યાર્થીઓએ એક દિવસ માટે શાળાના સંચાલનથી લઈને શૈક્ષણિક અને વહીવટી કામગીરીની વિવિધ જવાબદારીઓ સંભાળી હતી.
કાર્યક્રમ અંતર્ગત વિદ્યાર્થીઓએ શાળાના આચાર્ય, શિક્ષક, ક્લાર્ક, પટાવાળા સહિતની વિવિધ ભૂમિકાઓ નિભાવી હતી. વિદ્યાર્થીઓ શિક્ષક બનીને વિવિધ વર્ગોમાં ગયા હતા અને વિદ્યાર્થીઓને ભણાવવાની સાથે વર્ગવ્યવસ્થાનું સંચાલન પણ કર્યું હતું. શાળાના દૈનિક શૈક્ષણિક તેમજ વહીવટી કાર્યો વિદ્યાર્થીઓએ ઉત્સાહ, શિસ્ત અને જવાબદારીપૂર્વક સંભાળ્યા હતા.
આ અનોખી પ્રવૃત્તિનો મુખ્ય હેતુ વિદ્યાર્થીઓને શિક્ષક તેમજ શાળાના અન્ય કર્મચારીઓની કામગીરી, જવાબદારીઓ અને પડકારોનો પ્રત્યક્ષ અનુભવ કરાવવાનો હતો. એક દિવસ માટે અલગ-અલગ ભૂમિકાઓ નિભાવતા વિદ્યાર્થીઓમાં નેતૃત્વ ક્ષમતા, આત્મવિશ્વાસ, શિસ્ત, જવાબદારી અને ટીમવર્ક જેવા ગુણોનો વિકાસ થયો હતો.
કાર્યક્રમના અંતિમ બે પીરિયડ દરમિયાન વિદ્યાર્થીઓએ દિવસભરના પોતાના અનુભવો સૌ સમક્ષ રજૂ કર્યા હતા. વિદ્યાર્થીઓએ પોતાના ગુરુજનો પ્રત્યે આદર અને કૃતજ્ઞતા વ્યક્ત કરી શિક્ષકોનું સન્માન કર્યું હતું. આ પ્રસંગે શિક્ષકોએ પણ વિદ્યાર્થીઓને આશીર્વાદ આપી તેમના ઉજ્જવળ ભવિષ્ય માટે શુભેચ્છાઓ પાઠવી હતી.
આ સમગ્ર કાર્યક્રમ દરમિયાન શાળાના ટ્રસ્ટી શ્રીમતી ડૉ. અનિતાબેન પટેલ તથા આચાર્ય શ્રી દીપકભાઈ પટેલ ખાસ ઉપસ્થિત રહ્યા હતા. તેમણે વિદ્યાર્થીઓના ઉત્સાહ, શિસ્ત અને જવાબદારીપૂર્વક કરાયેલા કાર્યની પ્રશંસા કરી હતી અને આવી પ્રવૃત્તિઓ વિદ્યાર્થીઓના સર્વાંગી વિકાસ માટે મહત્વપૂર્ણ હોવાનું જણાવ્યું હતું.
શિક્ષક દિવસની આ અનોખી ઉજવણી વિદ્યાર્થીઓ માટે માત્ર એક દિવસની ભૂમિકા બદલવાની પ્રવૃત્તિ ન રહી, પરંતુ શિક્ષક અને શાળાના સમગ્ર સ્ટાફની મહેનત, જવાબદારી તથા મહત્વને નજીકથી સમજાવતો યાદગાર શૈક્ષણિક અનુભવ બની રહી હતી. કાર્યક્રમ દ્વારા વિદ્યાર્થીઓમાં શિક્ષકો પ્રત્યેનો આદર વધુ ગાઢ બન્યો હતો અને ‘શિક્ષક’ની ભૂમિકાની સાચી સમજ પણ વિકસિત થઈ હતી.