અમદાવાદ : સ્માર્ટફોન યુઝર્સ માટે સાવધાન કરતો કિસ્સો સામે આવ્યો છે જેમાં શહેરના વાડજ વિસ્તારનો 26 વર્ષીય યુવક સાયબર છેતરપિંડીનો ભોગ બન્યો છે. અજાણ્યા નંબર પરથી ન્યૂડ યુવતીનો વીડિયો કોલ કર્યા બાદ યુવકનો વીડિયો રેકોર્ડ થઈ ગયો હોવાનું કહી તેને વાયરલ કરવાની ધમકી આપવામાં આવી હતી. આ પછી યુવકને યુટયુબ અને સાયબર ક્રાઇમ સેલના અધિકારી તરીકે ઓળખ આપીને ડિજિટલ એરેસ્ટ કરીને 50 લાખ રૂપિયા જેટલી રકમ પડાવી લીધી હોવાની સાયબર ક્રાઇમ સેલમાં ફરિયાદ નોંધાઈ છે.
રિપોર્ટ મુજબ, શહેરના વાડજ વિસ્તારમાં રહેતો 26 વર્ષીય યુવક ખાનગી કંપનીમાં એકાઉન્ટન્ટ તરીકે કામ કરે છે. 3 સપ્ટેમ્બર 2026ના રોજ રાત્રે આશરે આઠ વાગ્યાના સુમારે પોતાના ઘરે મોબાઇલ ચેક કરી રહ્યો હતો. તે દરમિયાન તેના વોટ્સએપ પર અજાણ્યા નંબર પરથી વીડિયો કોલ આવ્યો હતો.જે રિસીવ કરતા સામે એક યુવતી નગ્ન હાલતમાં જોવા મળી હતી. જેમાં કોલ કરનારે આશરે બે મિનિટના વીડિયોનું સ્ક્રીન રેકોર્ડિંગ કરીને યુવકને બે વીડિયો મોકલ્યા હતા અને વાઈરલ કરવાની ધમકી આપી હતી અને એક વીડિયો દીઠ 71 હજાર રૂપિયા માંગ્યા હતા. જેથી એક વીડિયોના નાણાં યુવકે ચુકવી આપ્યા હતા.
થોડા સમય બાદ અન્ય નંબરથી કોલ આવ્યો હતો અને કોલ કરનારે યુટયુબના અધિકારી તરીકે ઓળખ આપીને ધમકાવ્યો હતો કે, આ વીડિયો અપલોડ થતા સાત વર્ષની કેસની સજા છે અને યુટયુબ પર વીડિયો મોકલાયા છે. જેથી સાયબર ક્રાઇમ પણ તપાસ કરશે, આમ કહીને આરોપીઓ યુવકને ડિજીટલ એરેસ્ટ કરીને ધમકાવીને તેની પાસેથી નાણાંની માંગણી કરવાનું શરૂ કર્યું હતું. ડરીને યુવકે કંપનીના એકાઉન્ટમાંથી 40 લાખ ટ્રાન્સફર કર્યા હતા.
બાદમાં બીજા 10 લાખ પણ મોકલ્યા હતા. તેમ છંતાય વધુ નાણાંની માંગણી ચાલુ રહેતા યુવકે કંપનીમાં 21 લાખની માંગણી કરતા તેની સાથે થયેલી ઘટના અંગે કંપનીના અધિકારીને જાણ થઇ હતી. છેવટે આ અંગે સાયબર ક્રાઇમ સેલમાં ફરિયાદ નોંધવામાં આવતા પોલીસે વધુ તપાસ શરૂ કરી છે.