અમદાવાદ : અમદાવાદમાં નવરાત્રી મહોત્સવને લઈને શહેર પોલીસ કમિશનર કચેરી દ્વારા જાહેરનામું બહાર પાડવામાં આવ્યું છે. જાહેરનામા મુજબ 11 ઓક્ટોબરથી 20 ઓક્ટોબર, 2026 દરમિયાન નવરાત્રીના ગરબા અને દશેરા સંબંધિત કાર્યક્રમો માટે માઈક સિસ્ટમ, સાઉન્ડ સિસ્ટમ અને પબ્લિક એડ્રેસ સિસ્ટમના ઉપયોગ અંગે સમયમર્યાદા નક્કી કરવામાં આવી છે.
શહેર પોલીસ કમિશનર કચેરી દ્વારા જાહેરનામા મુજબ, રાત્રે 10 વાગ્યાથી 12 વાગ્યા સુધી સાઉન્ડ સિસ્ટમ, માઈક સિસ્ટમ અને પબ્લિક એડ્રેસ સિસ્ટમનો ઉપયોગ કરી શકાશે. રાત્રે 12 વાગ્યા બાદ માઈક સિસ્ટમ, લાઉડસ્પીકર અને પબ્લિક એડ્રેસ સિસ્ટમ ચલાવી શકાશે નહીં. આ ઉપરાંત નોઈઝ પોલ્યુશન સંબંધિત નિયમોનું પાલન કરવાનું રહેશે. હોસ્પિટલ, શૈક્ષણિક સંસ્થાઓ અને કોર્ટની આસપાસના સાયલન્સ ઝોનમાં પણ આવી સાઉન્ડ સિસ્ટમના ઉપયોગ પર પ્રતિબંધ રહેશે.શાંતિ, સલામતી અને ધ્વનિ પ્રદૂષણના નિયમોનું પાલન સુનિશ્ચિત કરવા માટે પોલીસ કમિશનર દ્વારા સમગ્ર અમદાવાદ શહેર પોલીસ કમિશનરેટ વિસ્તારમાં આ નિયંત્રણો લાગુ કરવામાં આવ્યા છે.
શહેરમાં આવેલા અતિ સંવેદનશીલ વિસ્તારો જેવા કે હોસ્પિટલો, નર્સિંગ હોમ, શૈક્ષણિક સંસ્થાઓ (શાળાઓ-કોલેજો) અને અદાલતોની આસપાસ જાહેર કરાયેલા સાયલન્સ ઝોનમાં લાઉડ સ્પીકર કે કોઈપણ પ્રકારની પબ્લિક એડ્રેસ સિસ્ટમ વગાડવા પર પૂર્ણપણે પ્રતિબંધ રહેશે. દર્દીઓ, વિદ્યાર્થીઓ અને સ્થાનિક નાગરિકોને ધ્વનિ પ્રદૂષણથી મુશ્કેલી ન પડે તે માટે આ વિસ્તારમાં સખ્તાઈથી અમલ કરાવવામાં આવશે.
અમદાવાદ શહેર પોલીસે તમામ ગરબા આયોજકો, મંડળો અને નાગરિકોને આ નિયમોનું ચુસ્ત પાલન કરવા તાકીદ કરી છે. જો કોઈ વ્યક્તિ કે આયોજક નિર્ધારિત ડેસિબલ મર્યાદા કરતા વધુ અવાજ કરશે કે રાત્રે 12 વાગ્યા પછી લાઉડ સ્પીકર ચાલુ રાખશે, તો તેમની સામે ગુજરાત પોલીસ અધિનિયમ તેમજ ધ્વનિ પ્રદૂષણ નિયમન કાયદા હેઠળ કડક દંડાત્મક અને ફોજદારી કાર્યવાહી હાથ ધરવામાં આવશે.