અમદાવાદ : છેલ્લા બે ત્રણ વર્ષથી યુવાનોમાં નવરાત્રિ દરમિયાન ફરી પરંપરગત રીતે ઢોલ અને શરણાઈના તાલે કોઈ ઇનેક્ટ્રિક સાધનો વિના ગરબા રમવાનો ટ્રેન્ડ વધ્યો છે. તેથી દર વર્ષે આ પ્રકારના આયોજનો પણ વધી રહ્યા છે. ત્યારે આ વર્ષે અમદાવાદમાં થલતેજ વિસ્તારમાં વૃંદાવન પાર્ટી લોન ખાતે શરણાઈ- મંડળી ગરબામાં ઢોલના તાલે અને શરણાઈના સૂરે ગરબાની રમઝટ બોલાવશે.
પ્રાપ્ત વિગતો મુજબ, અમદાવાદ શહેર ભારતીય જનતા પાર્ટીના પ્રમુખ પ્રેરકભાઈ શાહના વરદ હસ્તે ‘શરણાઈ’ મંડળી ગરબાનો શુભારંભ કરાયો છે. આ પ્રસંગે મહાઆરતી કરી નવરાત્રી ગરબાના કાર્યક્રમનુ ઉદ્ઘાટન કરવામાં આવ્યું હતું. આ ઉદ્ઘાટન પ્રસંગે મ્યુ કાઉન્સિલરો રાકેશભાઈ પરીખ અને જીતુભાઈ ખરચરીયા, વિનોદ બોડકીયા અને પરિવારજનો સહિત મોટી સંખ્યામાં ખેલયાઓ ઉપસ્થિત રહ્યા હતા.
નવરાત્રિના 9 દિવસ એટલે કે 11 ઓક્ટોબર થી 20 ઓક્ટોબર 2026 સુધી અમદાવાદના થલતેજ વિસ્તારમાં સિંધુ ભવન રોડ પર આવેલ વૃંદાવન પાર્ટી લોન ખાતે આ શરણાઈ- મંડળી ગરબાનું આયોજન કરવામાં આવ્યું છે. આ ગરબાનું આયોજન અમદાવાદના તત્વ ઈવેન્ટ્સના ફાઉન્ડર નૃપ બોડકીયા (ઓર્ગેનાઇઝર) દ્વારા કરવામાં આવ્યું છે.
તત્વ ઈવેન્ટ્સના ફાઉન્ડર નૃપ બોડકીયાએ જણાવ્યું હતું કે, દેશી ઢોલ, સંગીત અને ડીજે દ્વારા લોકોને એકસાથે લાવવાના સહિયારા જુસ્સા સાથે અમે ‘શરણાઈ’નું આયોજન કર્યું છે. અમદાવાદમાં પ્રથમ વાર એક અલગ પ્રકારની ગરબા થીમ પર આધારિત કાર્યક્રમ મંડળી ગરબા, ટોટલ શરણાઈ અને દેશી ઢોલના સથવારે પરંપરાગત ટેકનો ગરબાનું આયોજન કર્યું છે.ગુજરાતના સમૃદ્ધ સાંસ્કૃતિક વારસા પ્રત્યેના પ્રેમથી પ્રેરાઈને અમે આ વર્ષે સૂરજની પહેલી કિરણ સુધી ગરબાની રમઝટ બોલાવીશું.
આ ઉપરાંત ગરબામાં આવનારા લોકોને પાર્કિંગથી લઈ સુરક્ષા તેમજ ફાયર સેફ્ટી વગેરેનું ધ્યાન રાખવામાં આવ્યું છે. ગરબા સ્થળ સુધી આવનાર તમામ લોકોને પૂરતા પ્રમાણમાં પાર્કિંગ આપવામાં આવ્યું છે. પાર્કિંગ સ્થળે લાઇટ અને સીસીટીવી કેમેરાની વ્યવસ્થા કરવામાં આવી છે. પાસની કિંમત પ્રતિ વ્યક્તિ રૂ. 250 રાખવામાં આવી છે. સુરક્ષાને ધ્યાનમાં રાખી પુરૂષ અને મહિલા સિક્યોરિટી ગાર્ડ રાખવામાં આવ્યા છે. ઉપરાંત અન્ય એન્ટ્રીમાં હાઈટેક સિક્યોરિટીની વ્યવસ્થા પણ કરવામાં આવી છે.