અમદાવાદ : અમદાવાદ શહેરમાં ચા સ્ટોલના પર પેપર કપ પર પ્રતિબંધ મામલે AMC તંત્રની કડક કાર્યવાહીને પરિણામે ચાની કીટલી ધારકોમાં ફફડાટ જોવા મળી રહ્યો છે. પેપર કપ પર પ્રતિબંધની જાહેરાત બાદ હવે કેટલાક ચા સ્ટોલના ધારકોએ પેપર કપ વાપરવાનું સંપૂર્ણ પણે બંધ કરી દીધું છે. હવે ચાની કીટલીઓ ઉપર કાચના ગ્લાસ અને પવાલી, કુલ્લડ અને વેફર કપનો વપરાશ થઈ રહ્યો છે. પરંતુ અનેક ચા સ્ટોલ વાળાઓએ મોકાના ફાયદો ઉઠાવી ચા-કોફીના ભાવ વધુ વસૂલવાનું શરૂ કર્યું છે, જેને કારણે ચાના રસિકોમાં ભારે રોષ જોવા મળી રહ્યો છે.
અમદાવાદમાં AMC તંત્રના સોલીડ વેસ્ટ વિભાગની કડક કાર્યવાહીનો ચા સ્ટોલના ધારકોએ પેપર કપ વાપરવાનું સંપૂર્ણ પણે બંધ કરી દીધું છે. પરંતુ જેમ લેભાગુ તત્વ બધે હાજર હોય તેમ અનેક ચાની કીટલી વાળાઓએ ચા-કોફીના ભાવ વધુ વસૂલવાનું શરૂ કર્યું છે. ચાની કીટલી અને લારીઓ પર કાચના ગ્લાસ અને પવાલીમાં ચાનો ભાવ જૂનો જ છે, પરંતુ જો કુલ્લડ કે વેફર કપમાં ચા પીવો તો 5 રૂપિયા વધારે ચૂકવવા પડે છે.કુલ્લડ અને વેફર કપમાં મળતી ચાના ભાવમાં પણ વધારો કરવામાં આવ્યો છે. જેમાં 10 રૂપિયામાં મળતી ચાના હવે લોકોએ 15 રૂપિયા ચુકવવા પડે છે.
આ ઉપરાંત પાર્સલ ચા લઈ જતાં લોકોને મહામુશ્કેલીઓનો સામનો કરવો પડી રહ્યો છે જેને કારણે ચાની કીટલીવાળાઓ સાથે ખટરાગ જોવા મળી રહ્યો છે. કેટલીક કીટલીઓ પર રૂપિયા 15 ની ચામાં બે કુલ્લડ જ સાથે આપવામાં આવે છે. એકંદરે પેપર કપ ઉપર પ્રતિબંધને કેટલાક ચાના કીટલીધારકો સારો નિર્ણય પણ ગણાવી રહ્યા છે. તેઓ હવે કુલ્લડમાં ચા આપી રહ્યા છે. જોકે આ નિર્ણયના કારણે ચા થોડી મોંઘી પણ બની ગઈ છે.