અમદાવાદ : રાજ્યના હવામાન વિભાગે આ વખતનો ઉનાળો આકરા રહેવાનું અનુમાન કર્યુ છે. જો કે અમદાવાદ મહાનગરપાલિકા AMCએ આ વખતે થોડી વહેલી જાગી છે અને હિટ એક્શન પ્લાન તૈયાર કર્યો છે. અમદાવાદ મ્યુનિસિપલ કોર્પોરેશન AMC દ્વારા ઉનાળાની ગરમીને ધ્યાનમાં રાખીને એક્શન પ્લાન તાત્કાલિક અસરથી તૈયાર કરાયો છે જે મુજબ, હવે BRTS-AMTS બસ ડેપો પર પાણીની વ્યવસ્થા કરાશે. સાથે જ ડેપો પર ORS પણ મળશે. એટલુ જ નહિ, બપોરના સમયે ગાર્ડન ખુલ્લા રાખવાના પણ આદેશ કરાયા છે. અને શહેરીજનોને ગરમીમાંથી રાહત મળે તેવી વ્યવસ્થા ઉભી કરી છે.
આગામી ઉનાળા અને તેને આનુષંગિક કામગીરી અંગે AMC દ્વારા હિટ એક્શન પ્લાનનું આયોજન કરાયું છે. AMC હેલ્થ કમિટીના ડેપ્યુટી ચેરમેન પ્રકાશ ગુર્જરે જણાવ્યું કે, અમદાવાદના તમામ AMTS અને BRTS બસ સેન્ટર પર ORS ના પાઉચ પુરા પાડવામાં આવશે. તેમજ શહેરમાં વિવિધ સ્થળે પાણીની પરબ ઉભી કરવામાં આવશે. હીટસ્ટ્રોક, ડીહાઇડ્રેશન અને તેના સંબંધી કેસની અલગથી નોંધણી થશે. AMC સંચાલિત તમામ હોસ્પિટલમા હિટ સ્ટ્રોકને માટે અલગ વોર્ડ બનાવવા સૂચના આપી દેવાઈ છે. ગરમી શરૂ થતા જ હવામાન વિભાગ સાથે રહીને નિયમિત રીતે એડવાન્સ એલર્ટ આપવામાં આવશે.
