અમદાવાદમાં હાર્ટ એટેકથી વધુ એક મોત, સ્કૂલમાં મધ્યાહન ભોજનમાં હેલ્પર સ્ત્રીને આવ્યો હૃદયરોગનો હુમલો

અમદાવાદ : અમદાવાદમાં હાર્ટ એટેકથી વધુ એક મોતની ઘટના ઘટી છે. મધ્યાહન ભોજન યોજનાની મહિલા કર્મચારીને હૃદયરોગનો હુમલો આવતા મોત થયું છે. આ અંગે મળતી માહિતી મુજબ વિવેકાનંદનગર ગુજરાતી શાળા નંબર-1માં મધ્યાહન ભોજન યોજનામાં ભોજન પીરસવાનું કામ કરતી મહિલાનું હાર્ટ-એટેકથી મોત થયું છે. ભોજન પીરસતી વખતે મહિલા અચાનક ઢળી પડી હતી, આથી વિદ્યાર્થીઓ અને સ્કૂલ સ્ટાફમાં અફરાતફરી મચી ગઈ હતી. બાદમાં 108ને જાણ કરતાં ટીમ દોડી આવી હતી. 108ના સ્ટાફે મહિલાને સીપીઆર આપ્યો હતો. જોકે મહિલાના શ્વાસ પરત ફરી શક્યા નહોતા.

પ્રાપ્ત વિગત મુજબ, અમદાવાદમાં વિવેકાનંદનગર ગુજરાતી શાળા નંબર-1માં મધ્યાહન ભોજનમાં ભોજન પીરસવાનું કામ કરતી 60 વર્ષીય મહિલા હેલ્પર તરીકે નોકરી કરતાં હતાં. આજે સવારે 10:30 વાગ્યાની આસપાસ અચાનક જ તેઓ જ્યારે સ્કૂલમાં હતાં ભોજન પીરસતી વખતે મહિલાને અચાનક છાતીમાં દુખાવો ઉપડ્યો હતો અને બનાવના સ્થળે ઢળી પડ્યા હતા, તાત્કાલિક 108 ને બોલાવતા સ્ટાફે મહિલાને સીપીઆર આપ્યો હતો. જોકે મહિલાના શ્વાસ પરત ફરી શક્યા નહોતા.તેઓનું ઘટનાસ્થળે જ હાર્ટ-એટેક મૃત્યુ થયું હતું.

ગઈકાલે સુરતમાં ગરબા રમી રહેલા 26 વર્ષીય યુવક અચાનક ઢળી પડ્યો હતો, જેથી તેને તાત્કાલિક સારવાર અર્થે હોસ્પિટલ લઈ જવામાં આવ્યો હતો, જ્યાં ફરજ પરના તબીબે યુવકને મૃત જાહેર કર્યો છે. અમદાવાદ શહેરના ખાનપુર વિસ્તારમાં રહેતા આશરે 29 વર્ષીય યુવાનનું હાર્ટ એટેકથી મોત થયુ છે. 27 સપ્ટેમ્બરના રોજ હર્ષ સંઘવી નામના યુવક રાજસ્થાન તીર્થ યાત્રાથી પરત ફરી રહ્યો હતો ત્યારે બસમાં જ અચાનક હાર્ટ એટેક આવ્યો હતો. હર્ષ સંઘવી પોતાના પરિવાર સાથે યાત્રા કરવા ગયા હતા.

તે પહેલા 26 સપ્ટેમ્બરે જામનગર અને સુરતમાં હાર્ટ એટેકના બે બનાવ બન્યા હતા ત્યારે આજે વધુ એક બનાવ બન્યો છે. જામનગરમાં પટેલ પાર્ક વિસ્તારમાં 19 વર્ષીય યુવકનું ગરબા પ્રેકિટ્સ કરતાં હૃદય રોગના હુમલાથી અપમૃત્યુ થયુ હતું જ્યારે સુરતના કતારગામ GIDC વિસ્તારમાં યુવાનનું ઊંઘમાં હાર્ટ અટેકથી મોત થયું હતું.