અમદાવાદ : અમદાવાદમાંથી ફરી એકવાર મસાજની આડમાં દેહવેપાર થતો હોવાનું ઝડપાયું છે. આનંદનગર વિસ્તારમાં હાલો સ્પા એન્ડ મોરમાં પોલીસે દરોડા પાડ્યા હતા. ડમી ગ્રાહક મોકલી પોલીસે દેહવેપારનો પર્દાફાશ કર્યો છે. આ મામલે મહિલા સંચાલક અને મેનેજરની ધરપકડ કરવામાં આવી છે. દરોડા પાડતા સ્પમાંથી 3 યુવતીઓ અને 3 મહિલાઓ મળી આવી છે. આનંદનગર પોલીસ મથકે આ સમગ્ર મામલે ગુનો નોંધાયો છે.પોલીસના દરોડા બાદ મસાજ પાર્લરના સંચાલકો દ્વારા અંડર મેઇટેનન્સનું બોર્ડ લગાવી દેવાયું છે.
પ્રાપ્ત રિપોર્ટ મુજબ શહેરના આનંદનગર વિસ્તારમાં રોડ ઉપર જ આવેલી દેવ એન્ટિલિયર નામની બિલ્ડીંગમાં આ હાલો સ્પા એન્ડ મોર આવેલું છે. આ મસાજ પાર્લરમાં મસાજના ઓઠા હેઠળ કુટણખાનું ચાલતું હોવાની બાતમી આનંદનગર પોલીસને મળી હતી. જેના અનુસંધાને પોલીસે એક ડમી ગ્રાહકને મસાજ પાર્લરમાં મોકલ્યો હતો. જેમાં મસાજ પાર્લરના સંચાલકોના ગોરખધંધા સામે આવ્યા હતા. જેના પછી પોલીસે મસાજ પાર્લર ઉપર દરોડા પાડતા ત્રણ યુવતીઓ અને ત્રણ મહિલાઓ મળી આવી હતી.
આ મામલે મહિલા સંચાલક અને મેનેજરની પણ ધરપકડ કરવામાં આવી છે. પોલીસના દરોડા બાદ હાલ આ મસાજ પાર્લર પર અંડર મેન્ટેનન્સનું બોર્ડ મારી બંધ કરી દેવામાં આવ્યું છે. ત્યારે સવાલ એ થાય છે કે ચોવીસ કલાક વાહનોથી ધમધમતા રોડ પર જે રીતે કોઇ પણ રોકટોક કે પોલીસના ડર વિના જે રીતે બિન્દાસ આ મસાજ પાર્લરમાં કુટણખાનું ચાલતું હતું.તે શહેરમાં કાયદો અને વ્યવસ્થાની સ્થિતિ સામે ગંભીર પ્રશ્નો ઉભા કરી જાય છે.
હાલ આ મામલે આનંદનગર પોલીસ સ્ટેશનમાં ગુનો નોંધાયો છે.અને મસાજપાર્લરની મહિલા સંચાલક અને મેનેજરની ધરપકડ કરવામાં આવી છે.આ મસાજપાર્લરમાં જે યુવતીઓ મળી આવી છે તેમને કોઈ મજબૂરીવશ અથવા બીજા રાજ્યમાંથી બળજબરીપૂર્વક અહીં લાવીને આ પ્રકારના દુષ્કૃત્યો કરાવવામાં આવે છે તે બાબતે વધુ જાણકારી પોલીસ તપાસ બાદ બહાર આવી શકે એમ છે.
તમને જણાવી દઈએ કે થોડાક દિવસ અગાઉ જ અમદાવાદમાં એક યુવતીને સ્પા માલિક દ્વારા ઢોર માર મારવાનો મામલો સામે આવ્યો હતો. અમદાવાદના બોડકદેવ વિસ્તારમાં 25 સપ્ટેમ્બરના રોજ મોડી રાતે સિંધુ ભવન રોડ પર આવેલા ગેલેક્સી સ્પાના માલિકે યુવતી સાથે લાફાવાળી કરી હોવાના ઘટના બની હતી.
જેમાં આરોપી સ્પા માલિકે યુવતી સાથે ઉદ્ધતાઈ ભર્યું વર્તન કરી યુવતીના કપડાં પણ ફાડી નાખ્યા હતા, જેના સીસીટીવી ફૂટેજ સામે આવ્યા હતા. વીડિયોમાં સ્પા માલિક યુવતીને મોઢા પર ફેંટો મારી રહ્યો હતો અને યુવતીને બચાવવા આવેલા એક વ્યક્તિને પણ સ્પા માલિકે ધમકી આપીને વચ્ચે ના પડવાનું કહ્યું હતું. જો કે ઘટનાનો વીડિયો વાયરલ થયા બાદ પોલીસે આરોપીની ધરપકડ કરી કાર્યવાહી હાથ ધરી હતી.