અમદાવાદ : એન્ટી કરપ્શન બ્યુરો (ACB) એ પોતાની ફરજ ભૂલી બેસેલા અધિકારીઓને ધોળે દિવસે તારા દેખાડવાનું શરૂ કર્યું છે. ACBએ અમદાવાદના બાપુનગર પોલીસ સ્ટેશનના એક મહિલા PSIને માત્ર 1000 રૂપિયાની લાંચ લેતા રંગે હાથે ઝડપી પાડ્યા છે.
પ્રાપ્ત રિપોર્ટ મુજબ શહેરના બાપુનગર પોલીસ સ્ટેશનમાં મારામારીના ગુનામા ફરિયાદીની બાઇક પોલીસ દ્વારા કબજે કરવામાં આવી હતી. આ બાઈક છોડાવવા માટે ઇસમે કોર્ટમાં અરજી કરી હતી, પરંતુ આ અરજીમાં પોલીસનો અભિપ્રાય જોડવો ફરજિયાત હતો, જેથી ફરિયાદી ડાયમંડ ચોકીના મહિલા PSI જે.એસ રાવલ પાસે ગયો હતો. આ દરમિયાન અભિપ્રાય આપવા માટે PSI તરફથી બે હજાર રૂપિયાની માંગણી કરવામાં આવી હતી.
PSIના રાયટર તરીકે કામ કરતા રીંકુ પટણીએ એક હજાર રૂપિયા લઈ લીધા હતા. પરંતુ ફરિયાદીને અન્ય એક હજાર રૂપિયા આપવા ન હોવાથી તેને ACBનો સંપર્ક સાધ્યા હતો. તો ACBએ ફરિયાદીની ફરિયાદના આધારે ભ્રષ્ટ પોલીસ અધિકારીઓને પકડી પાડવા માટે ટ્રેપ ગોઠવી દીધી હતી. ટ્રેપ દરમિયાન પોલીસ કોન્સ્ટેબલ રિંકુ અને મહિલા PSI જે.એસ રાવલ લાંચ લેતા રંગે હાથે ઝડપાઇ ગયા હતા. ACBએ બંને પોલીસ કર્મચારીઓની ધરપકડ કરીને આગળની કાર્યવાહી હાથ ધરી છે.
આ અગાઉ સાયબર ક્રાઈમનો કર્મચારી ત્રણ લાખની લાંચ પ્રકરણમાં એસીબીના હાથે ઝડપાયો હતો. હવે આ પ્રકરણમાં એક પીઆઇ શંકાસ્પદ છે અને એની સંડોવણી અંગે તપાસ ચાલી રહી છે. હજી તપાસ પૂરી નથી થઈ ત્યારે અમદાવાદના બાપુનગર પોલીસ સ્ટેશનના એક મહિલા PSI માત્ર 1000 રૂપિયાની લાંચ લેતા રંગે હાથે ઝડપાયા છે. હવે ACB દ્વારા સરકારી કચેરીઓની બહાર પણ ટીમ ગોઠવવાની તૈયારીઓ કરવામાં આવી રહી છે.