અમદાવાદ : અમદાવાદ મ્યુનિસિપલ કોર્પોરેશનના CNCD વિભાગે નવતર પ્રયોગ હાથ ધર્યો હતો. CNCD વિભાગની ત્રણેય સિફ્ટની ટીમો દ્વારા શહેરના વિવિધ વિસ્તારોમાં જ્યાં પણ રોડ ઉપર દોરી અથવા લટકતી દોરી-પતંગ દેખાય તો તેને એકત્ર કરવાની કામગીરી કરવામાં આવી હતી. ઉત્તરાયણના દિવસે એક જ દિવસમાં 30 કિલોથી વધુ દોરીનો જથ્થો રોડ ઉપરથી ભેગો કરવામાં આવ્યો હતો.
CNCD વિભાગના સૂત્રોના જણાવ્યા મુજબ ઉત્તરાયણના દિવસે દોરીના કારણે અકસ્માતના બનાવો બનતા હોય છે. જેને રોકવા માટે ચાલુ વર્ષે CNCD વિભાગની ટીમો દ્વારા રોડ પરથી દોરીના જથ્થાને એકત્રિત કરવાની કામગીરી કરવામાં આવી હતી. શહેરના વિવિધ વિસ્તારોમાં દરેક ઝોન વાઇઝ ફાળવેલી CNCD વિભાગની ટીમો દ્વારા રોડ ઉપર જ્યાં પણ દોરીના જથ્થા કે લટકતી દોરી જોવા મળે તો તેને એકત્રિત કરી લેવામાં આવતી હતી. રોડ ઉપર ક્યાંય પણ દોરી લટકતી હોય અથવા દોરી રોડ ઉપર હોય તો વાહનમાં આવી જતા અકસ્માતના બનાવો બનતા હોય છે. જેથી નાગરિકોને મુશ્કેલી ન પડે તેને ધ્યાનમાં રાખીને આ કામગીરી કરવામાં આવી હતી.
આ ઉપરાંત ઉત્તરાયણના તહેવારના દિવસે દાન અને ગાયને ઘાસ ખવડાવવાનું પણ મહત્વ હોય છે. જેને ધ્યાનમાં રાખી મ્યુનિસિપલ કોર્પોરેશનના ઢોરવાડા ખાતે CNCD વિભાગે એક અલગ પ્રકારનો શેડ ઊભો કર્યો હતો. જે પણ લોકો ગાયને ઘાસ કે અન્ય વસ્તુઓ ખવડાવવી હોય તો તેના માટે એક અલગ જ જગ્યા ઊભી કરવામાં આવી હતી.જ્યાં ઢોરવાડામાં રાખેલી ગાયોને લાવવામાં આવી હતી અને ત્યાં જ લોકો ગાયને ઘાસ, ગોળ, રોટલી વગેરે વસ્તુઓ ખવડાવતા હતા. ઉત્તરાયણના દિવસે મ્યુનિસિપલ કોર્પોરેશનના ઢોરવાડામાં 170 જેટલા લોકોએ મુલાકાત લીધી હતી અને ઢોરવાડામાં રાખેલી ગાયને ઘાસચારો વગેરે ખવડાવી દાન પુણ્ય કર્યું હતું.
