અમદાવાદ : શહેર પોલીસ કમિશનર જી.એસ.મલિક દ્વારા પોલીસ ઇન્સ્પેક્ટરોની મોટા પાયે બદલીઓ કરવામાં આવી છે. 62 પોલીસ ઇન્સ્પેક્ટરોની નિમણૂંક અને બદલી કરીને પોસ્ટિંગ આપવામાં આવ્યું છે, જેમાં 28 પોલીસ ઇન્સ્પેક્ટરને લિવ રિઝર્વમાંથી શહેરમાં પોસ્ટિંગ ફાળવવામાં આવ્યા છે, જયારે બદલી સાથે આવેલાં 34 પોલીસ ઇન્સ્પેક્ટરને શહેરના વિવિધ પોલીસ સ્ટેશનમાં ચાર્જ સોંપવામાં આવ્યો છે. આ બદલી અને નિમણૂંક પારદર્શકતા સાથે મેરીટના આધારે કરવામાં આવી છે.
અમદાવાદ શહેરમાં ચૂંટણીલક્ષી બદલીઓ થઈ અને તેમાં સંખ્યાબંધ પોલીસ ઇન્સ્પેક્ટરની બદલી અમદાવાદ શહેરમાંથી અન્ય જગ્યાએ થઈ ગઈ હતી. જેના કારણે અમદાવાદ શહેરના ઘણા મોટા પોલીસ સ્ટેશન ઇન્ચાર્જમાં ચાલી રહ્યાં હતાં અને આ જગ્યાઓ ભરવા માટે ઘણા સમયથી રાહ જોવાઈ રહી હતી, ત્યારે આજે (8 માર્ચ, 2024) અમદાવાદ શહેર પોલીસ કમિશનર જી.એસ.મલિકે એક સાથે 62 પોલીસ ઇન્સ્પેક્ટરની બદલી કરી છે. મોટા પાયે પારદર્શિતા રહે તે પ્રકારે બદલી કરવામાં આવી છે.
તમને જણાવી દઈએ કે અમદાવાદના સોલા, ઘાટલોડિયા, નારણપુરા, સરખેજ, વેજલપુર, પાલડી, આનંદનગર, સેટેલાઈટ, ચાંદખેડા અને સાબરમતી રિવરફ્રન્ટ ઈસ્ટ પોલીસ સ્ટેશન ઇન્ચાર્જ PI સાથે ચાલી રહ્યા છે. જયારે એરપોર્ટ, કૃષ્ણનગર, સરદારનગર, ગોમતીપુર, રખિયાલ, અમરાઈવાડી અને ઈસનપુર પોલીસ સ્ટેશનમાં પણ PI જ નથી.આમ અમદાવાદ શહેરમાં એક સાથે 62 ઇન્સ્પેક્ટરની બદલી થવાથી પોલીસ બેડામાં મોટો ચર્ચાનો વિષય બન્યો છે.