અમદાવાદ : રાજસ્થાનના ઉદેપુરની યુવતી અમદાવાદ ફરવા આવી હતી. ગીતા મંદિર ખાતે બસ ન મળતા તે રિક્ષામાં બેસીને નોબલ નગર ખાતે આવી પહોંચી હતી આ સમયે રાતે મોડું થઇ ગયું હતું, જ્યાં મદદ કરવાના બહાને હોમગાર્ડ જવાને તેને નાના ચિલોડા પાસે હોટલમાં લઇ જઇને તેની સાથે દુષ્કર્મ આચર્યું હતું. આ બનાવ અંગે યુવતીએ હોમગાર્ડ જવાન સામે દુષ્કર્મની ફરિયાદ નોધાવતા નરોડા પોલીસે આરોપીની ધરપકડ કરીને વધુ તપાસ હાથ ધરી છે.
પ્રાપ્ત રિપોર્ટ મુજબ રાજસ્થાનના ઉદયપુરમાં રહેતી 24 વર્ષીય યુવતી 11મી મેના રોજ અમદાવાદમાં ફરવા આવી હતી અને 12મી મેના રોજ અમદાવાદ પહોંચ્યા તે રિવરફ્રન્ટ, વૈષ્ણોદેવી મંદિર, ગાંધી આશ્રમ અને કાંકરિયા જેવી અલગ અલગ જગ્યાઓ પર ફરી હતી. રાત્રે 10 વાગ્યા આસપાસ રાજસ્થાન પરત જવા માટે ગીતામંદિર એસટી સ્ટેન્ડ પહોંચી હતી, જ્યાં જમવા જતા ઉદેપુર ખાતે જતી બસ નીકળી ગઈ હતી. આસપાસના લોકોએ તેને ચિલોડાથી ઉદેપુરની બસ મળી જશે તેવું કહેતા તે રિક્ષામાં બેસીને ચિલોડા બાજુ પહોંચી હતી. જ્યાં હોમગાર્ડ જવાન અક્ષય રાઠોડનો પોઇન્ટ હતો અને હોમગાર્ડ જવાન વર્ધીમાં હોય રાતનો સમય હોય યુવતીએ તેના પર વિશ્વાસ કરી મદદ માગી હતી.
આરોપી હોમગાર્ડ જવાન અક્ષય રાઠોડ નરોડા વિસ્તારનો રહેવાસી છે.. પરિણીત અને દોઢ માસના બાળકનો પિતા છે.. 4 વર્ષથી ટ્રાફિક બ્રિગેડમાં ફરજ બજાવતો હતો..જ્યારે એક વર્ષથી હોમગાર્ડ તરીકે નોકરી કરે છે.. અક્ષય રાઠોડનો રાત્રે બંદોબસ્તનો પોઇન્ટ નોબલ નગર હતો.. જ્યારે યુવતી રાજસ્થાનની રહેવાસી છે અને અભ્યાસ કરે છે.. આ યુવતીની ટ્રાવેલ્સ છૂટી જતા આરોપી પોતાની બાઈક પર યુવતીને નાના ચિલોડા લઈ ગયો હતો પરંતુ ત્યાં પણ ટ્રાવેલ્સ નહિ મળતા યુવતીએ હોટલમાં રોકાવવાનું નક્કી કર્યું..
