અમદાવાદ : શહેરમાં જાહેર રોડ ઉપર કચરો નાખી ગંદકી કરતા નાગરિકો અને ધંધાકીય એકમો સામે મ્યુનિસિપલ કોર્પોરેશન દ્વારા કાર્યવાહી કરવામાં આવે છે, ત્યારે મ્યુનિસિપલ કોર્પોરેશનમાં જ રોડ અને અન્ય કામગીરી કરતા કોન્ટ્રાક્ટરો દ્વારા AMC પ્લોટ અને જાહેર રોડ ઉપર કચરો મૂકી રાખી ગંદકી કરવામાં આવતા સોલિડ વેસ્ટ મેનેજમેન્ટ વિભાગ દ્વારા દંડ ફટકારવામાં આવ્યો છે.
પ્રાપ્ત રિપોર્ટ મુજબ જોધપુર વોર્ડમાં AMCના ઈજનેર વિભાગના કોન્ટ્રાકટરો દ્વારા તેઓની કામગીરી દરમિયાન નીકળતા કચરા કે વેસ્ટનો નિકાલ નિયત સ્થળે ન કરતાં મ્યુ.પ્લોટ અને રોડ પર ગંદકી કરતા કાર્યવાહી કરાઇ છે. ઈજનેર(પ્રોજેકટ) વિભાગના અને વ્હાઈટ ટોપિંગ રોડ બનાવનાર કોન્ટ્રાકટર બી.આર.ગોયલ દ્વારા રાહુલ ટાવર ચાર રસ્તાથી ઓમ ટાવર, અશ્વમેઘ ચાર રસ્તાથી ઓમકારેશ્વર મંદિર સુધીના રોડની કામગીરી દરમિયાન માટી પુરણી, રોડાં વગેરેનો નીકળેલ વેસ્ટ AMC પ્લોટમાં નાખતા 5 લાખનો દંડ ફટકારવા અંગેની નોટીસ આપવામાં આવી છે.
સરખેજ વોર્ડમાં કોન્ટ્રાક્ટર નરનારાયણ ઈન્ફ્રાસ્ટ્રકચર પ્રા.લી.ને પાંચા તળાવની સામેના ખુલ્લા AMC પ્લોટમાં કામગીરી દરમિયાન માટી પુરણી, રોડાં વગેરેનો નીકળેલો વેસ્ટ નાંખી ગંદકી કરતાં માલુમ પડતાં 2 લાખનો દંડ વસુલવા નોટીસ આપવામાં આવી છે. જ્યારે મકતમપુરા વોર્ડમાં કોન્ટ્રાકટર યુગ ઈન્ફ્રાસ્ટ્રકચર પ્રા.લી.ને મકતમપુરા વિસ્તારમાં આવેલ ટી.પી.85 રોડની ફુટપાથ અને કવિંગના કામના નીકળેલ વેસ્ટનો નિકાલ ન કરી મુકી રાખી ગંદકી કરતાં 1 લાખની પેનેલ્ટી વસુલવા નોટીસ આપવામાં આવી છે.