અમદાવાદ: જો લાયસન્સ ન હોય તો વાલીઓ પોતાના બાળકને વાહન ચલાવવા આપે નહીં, તેવી ખાસ અપીલ અમદાવાદ ટ્રાફિક DCP સફીન હસને કરી છે. લાયસન્સ ન હોવા છતાં બાળકો શાળાએ વ્હીકલ લઈને આવતા હોય છે. જો આવા કિસ્સામાં અકસ્માતની ઘટના બનશે તો વ્હીકલ જેના નામે હશે તે માલિક સામે કાયદેસરની કાર્યવાહી થશે.
આવતીકાલથી રાજ્યભરમાં સ્કૂલો શરૂ થવાની છે, ત્યારે રાજકોટ અગ્નિકાંડને ધ્યાનમાં અમદાવાદમાં કોઈ દુર્ઘટના ના સર્જાય તે માટે પહેલાથી જ સાવધાની રૂપે અમદાવાદના શ્યામાપ્રસાદ મુખર્જી હોલ પર ‘સલામત શાળા’ અભિયાન યોજાયું હતું. ટ્રાફિક પોલીસ કમિશનર, RTO, DEO, AMC અધિકારીઓએ મહત્વની બેઠક યોજી 1100 શાળાના સંચાલકોને બાળકોની સલામતી મુદ્દે અવગત કર્યા હતા.
13 જૂનથી શાળાઓમાં શૈક્ષણિક સત્ર શરૂ થઈ રહ્યું છે ત્યારે તે પૂર્વે બાળકોની સલામતી માટેનું અભિયાન શરૂ થયું છે. ટ્રાફિક પોલીસ કમિશનર, આરટીઓ, DEO, AMC અધિકારીઓએ મહત્વની બેઠક યોજાઇ હતી. સાથે જ શાળા સંચાલકો સાથે શાળાઓમાં ફાયર સેફ્ટી, રોડ ટ્રાફિક અકસ્માત સહિતના મુદ્દે ચર્ચા કરી હતી. આ બેઠકમાં 1500થી વધુ શાળાના સંચાલકો પણ હાજર રહ્યા હતા. સંચાલકોને શાળાઓમાં બાળકોની સાવચેતી રાખવા અંગે સૂચના આપવામાં આવી હતી.
ટ્રાફિક DCP સફીન હસને મીડિયા સાથેની વાતચીતમાં જણાવ્યું કે, આગામી અઠવાડિયાથી RTO, ટ્રાફિક, ફાયર અને DEOની ટીમ સરપ્રાઈઝ ચેકિંગ કરશે. બાળકો RTO માન્ય વાહનોમાં જ શાળાએ પહોંચે એ જરૂરી છે. આ ઉપરાંત ફાયર સેફ્ટી, નિયત કરેલ ઝડપે સ્કૂલ બસ કે સ્કૂલ વેન ચલાવવા સૂચના આપી છે. તેમજ 16થી વધુ ઉંમરના બાળકો જ ગિયર વગરનું વાહન ચલાવે એ સુનિશ્ચિત કરવું. ગિયરવાળા વાહનો ચલાવવા માટે 18 વર્ષથી વધુ ઉંમર જરૂરી છે. જો લાયસન્સ વગર બાળક વાહન ચલાવશે તો કાર્યવાહી કરવામાં આવશે.