અમદાવાદ : અમદાવાદમાં ટ્રાફિક પોલીસે નકલી ચલણી નોટો ઝડપતા સનસનાટી વ્યાપી ગઈ છે. અમદાવાદ ટ્રાફિક પોલીસે 500ની નકલી ચલણી નોટો સાથે ત્રણની ધરપકડ કરી છે. 500ના દરની નકલી 1,852 નકલી નોટો પકડાઈ છે, તે બાદ આરોપીઓને ઝડપીને આગળની કાર્યવાહી હાથ ધરી છે.
પ્રાપ્ત રિપોર્ટ મુજબ અમદાવાદ શહેર ટ્રાફિક પોલીસે અદાણી સર્કલ પાસેથી વાહન ચેકિંગ દરમિયાન નકલી ચલણી નોટો ઝડપી પાડી હતી. આઈ ડિવિઝન ટ્રાફિક પોલીસે મધ્ય પ્રદેશની એક ગાડીની તપાસ કરી હતી જેમાંથી નકલી ચલણી નોટો મળી આવી હતી. આઇ ડિવિઝન ટ્રાફિક પોલીસે નકલી ચલણી નોટો સાથે ત્રણ યુવક મેહુલ સોની, નિખિલ સોની અને વિશાલ કર્નાની ધરપકડ કરી હતી. આરોપીઓ પાસેથી 9.25 લાખના દરની 500ની નકલી ચલણી નોટો મળી આવી હતી.
ટ્રાફિક પોલીસે 1852 નોટો સાથે આરોપીઓને પકડીને રામોલ પોલીસ મથકે ગુનો નોંધવામાં આવ્યો હતો અને આરોપીઓને વધુ તપાસ માટે રામોલ પોલીસના હવાલે કરવામાં આવ્યા હતા.