અમદાવાદ : અમદાવાદની L.D કોલેજની હોસ્ટેલના રૂમમાં વિદ્યાર્થીનો મૃતદેહ મળ્યો છે. L.D. કોલેજની હોસ્ટેલના D બ્લોકમાં આ બનાવ બન્યો છે. મૃતક વિદ્યાર્થીના ગળા અને હાથ પર બ્લેડ માર્યાના નિશાન છે. વિદ્યાર્થીની હત્યા કરવામાં આવી છે કે તેણે આત્મહત્યા કરી છે.પોલીસ અને કોલેજનો સ્ટાફ ઘટનાસ્થળે પહોંચી ગયો છે. બનાવ અંગે ગુજરાત યુનિવર્સિટી પોલીસે તપાસ શરૂ કરી છે.
પ્રાપ્ત રિપોર્ટ મુજબ અમદાવાદમાં L.D કોલેજમાં કેમિકલ એન્જિનિંયરિંગના ચોથા સેમેસ્ટરમાં અભ્યાસ કરતો ઉર્વીન નામના વિદ્યાર્થીનો હોસ્ટેલના ત્રીજા માળે 435 નંબરના રૂમમાંથી મૃતદેહ મળ્યો હતો. મૃતક વિદ્યાર્થીના હાથમાં અને ગળાના ભાગે બ્લેડ માર્યાના નિશાન હતા. જે રૂમમાંથી મૃતદેહ મળી આવ્યો છે તે રૂમ ખંડેર હાલતમાં હતો. મૃતકનો મિત્ર સવારે રૂમ તરફ આવ્યો અને રૂમ બંધ જોયો ત્યારે શંકા ગઈ. આથી રૂમમાં તપાસ કરતા વિદ્યાર્થીનો લોહીથી લથપથ હાલતમાં મૃતદેહ પડ્યો હતો. જેથી પોલીસને જાણ કરવામાં આવી હતી. ગુજરાત યુનિવર્સિટી પોલીસે બનાવના સ્થળે પહોંચી તપાસ હાથ ધરી હતી.પરિવારને આ સમાચાર મળતા આઘાત લાગ્યો છે.
પોલીસની પ્રાથમિક તપાસમાં જાણવા મળ્યું છે કે, મૃતકે જાતે જ બ્લેડ મારી આપઘાત કરી લીધો છે. મૃતકની એક જુલાઈએ પરીક્ષા હતી. જેમાં મૃતક મોબાઈલ સાથે ઝડપાયો હતો. જેથી ભવિષ્ય અંગે ડર લાગતા મૃતકે પગલું ભર્યું હોવાનું સામે આવ્યું છે. મૃતક વિદ્યાર્થી માંડવીના ગોકુળવાસનો રહેવાસી છે. પોલીસે સમગ્ર મામલે વધુ તપાસ હાથ ધરી છે.