અમદાવાદ: AMCના એક વરિષ્ઠ અધિકારીને એન્ટી કરપ્શન બ્યુરોએ 20 લાખ રૂપિયાની લાંચ લેતા રંગે હાથ ઝડપી પાડ્યા હતા. ત્યારબાદ AMC ના આસિસ્ટન્ટ TDO હર્ષદ ભોજકના ઘરે એસીબી દ્વારા તપાસ કરવામાં આવી રહી છે.ACB ની ટીમ દ્વારા તેમના ઘરમાં સર્ચ ઓપરેશન શરૂ કરાયું છે. ACB ની ટીમ નાણાંની રકમની ગણતરી કરવા મશીન લઈને પહોંચી ગઈ છે. નારણપુરા સ્થિત નિવાસસ્થાને 20 લાખ રોકડ રકમ હોવા અંગે ACBએ સર્ચ શરૂ કર્યું.
પ્રાપ્ત રિપોર્ટ મુજબ, ફરીયાદીની વડીલો પાર્જીત જમીનમાં મકાનો/દુકાનો હતી, જે AMC દ્વારા કબ્જો લઈ તોડી નાખવામાં આવી હતી. જેથી મકાનો-દુકાનોના ભાડુઆતો તથા ફરીયાદીએ કાયદાકીય પ્રક્રિયા કરી હતી. જે અંગેની જાણ એન્જિનિયર આશિષ પટેલને થતા વચ્ચેનો રસ્તો કાઢી આપવા અને મદદરૂપ થવાની અવેજમાં લાંચની માંગણી કરી હતી, પરંતુ ફરિયાદી લાંચ આપવા માંગતા ન હોવાથી ACB નો સંપર્ક કરતાં લાંચના છટકાનું આયોજન કર્યું હતું. આશ્રમ રોડ ખાતેની રત્ના બિઝનેસ સ્ક્વેર ખાતે ACB એ છટકું ગોઠવી આરોપીઓને ફરીયાદી સાથે હેતુલક્ષી વાતચીત કરાવી લાંચની માંગણી કરતા, લાંચની રકમ સ્વીકારતા અને એકબીજાએ મદદગારી કરતા પકડી પાડ્યા હતા.
આ ઘટનાની મળતી માહિતી પ્રમાણે, ગુરુવારે અમદાવાદ મ્યુનિસિપલ કોર્પોરેશનના આસિસ્ટન્ટ TDO હર્ષદભાઈ મનહરલાલ ભોજક 20 લાખની લાંચ લેતા રંગે હાથ ઝડપાઈ ગયા હતા,જેઓના રહેણાંક ફ્લેટ પ્રગતિનગર (નારણપુરા) એરીયા અમદાવાદ ખાતે ACB ની ટીમે પંચ રૂબરૂ જડતી તપાસ કરતા રૂપિયા 73 લાખની રોકડ રકમ તથા સોનાનું બિસ્કીટ આશરે સાડા ચાર લાખની કિંમતનું મળી કુલ રૂપિયા 77 લાખ ઉપરાંતની માલમતા ધોરણસર કબજે કરેલ છે. દસ્તાવેજો તથા અન્ય મિલકતો બાબતે ને ચકાસણી અને જડતી ચાલી રહેલ છે.
ACB અમદાવાદ ગ્રામ્યના પોલીસ ઇન્સ્પેક્ટર એન.એન. જાદવના નેતૃત્વ હેઠળ આ ઓપરેશન હાથ ધરવામાં આવ્યું હતું. ACBના મદદનીશ નિયામકો કે.બી. ચુડાસમા અને એ.વી. પટેલે આ કાર્યવાહીનું સુપરવિઝન કર્યું હતું. બંને આરોપીઓ વિરુદ્ધ ભ્રષ્ટાચાર નિવારણ અધિનિયમ હેઠળ કેસ નોંધવામાં આવ્યો છે અને વધુ તપાસ ચાલુ છે.