અમદાવાદ : અમદાવાદ શહેરના પોશ ગણાતા બોડકદેવ વિસ્તારમાં બાળકો પાસે દારૂની ડિલિવરી કરાવવાનું રેકેટ ઝડપાયું છે. અમદાવાદના પોશ ગણાતા સિંધુભવન રોડ પરથી પોલીસે કિશોરને દારૂની 6 બોટલ સાથે ઝડપી પાડ્યો છે. કિશોરને પગાર પર રાખીને દારૂની ડિલિવરી કરાવવામાં આવતી હોવાનો ખુલાસો થયો છે.દારૂ આપનારી વ્યક્તિ બાળકોને સમજાવતો હતો કે તમારી હજી નાની ઉંમર છે, એટલે પોલીસ તમારી સામે કેસ કરશે નહીં અને તમને તમારા પૈસા મળી જશે. આ રેકેટ છેલ્લા બે મહિનાથી ચાલતું હતું.
પ્રાપ્ત રિપોર્ટ મુજબ, અમદાવાદ બોડકદેવ પોલીસને બાતમી મળી હતી કે, અમદાવાદમાં સિંધુભવન ત્રણ રસ્તા ખાતે નર્મદા આવાસના ગેટ પાસે એક ઇસમ જ્યુપીટર પર એક થેલામાં ઇંગ્લિશ દારૂનો જથ્થો રાખીને વેચાણ માટે ઉભો છે. બાતમીના આધારે પોલીસે તપાસ કરતા જ્યુપીટર નંબર GJ-1 XL2851માં એક કિશોર થેલો લઇને ઉભો હતો. પોલીસે કિશોરના થેલાની તપાસ કરતા તેમાંથી ભારતીય બનાવટની ઇંગ્લિશ દારૂની અલગ અલગ બ્રાન્ડની કાચની શીલબંધ 6 બોટલ મળી આવી હતી. પોલીસે પરમીટ માંગતા પરમીટ ના હોવાનું જણાવ્યું હતું.
પોલીસે વધુ પૂછપરછ કરતા કિશોરે આ દારુ અંકિત પરમારે આપેલ હોવાનું જણાવ્યું હતું અને અંકિતે દારૂનો જથ્થો વેચવા માટે 8 હજાર રૂપિયા પગારથી નોકરીએ રાખ્યો હોવાનું જણાવ્યું હતું. આ સાથે જ દારૂની એક બોટલના વેચાણ પર 200 કમિશન પણ આપવામાં આવતું હતું. છેલ્લા બે મહિનાથી કિશોર દારૂનું વેચાણ કરતો હોવાનું પોલીસને જણાવ્યું છે.પોલીસે અંકિત પરમાર સામે જુવેનાઇલ જસ્ટીસ એક્ટ કલમ 78,79 મુજબ કાયદેસરની કાર્યવાહી કરી વધુ તપાસ હાથ ધરી છે.