અમદાવાદ : રક્ષાબંધનનો તહેવાર આ વખતે 19 ઓગસ્ટે ઉજવાશે. ત્યારે આ તહેવાર નિમિત્તે AMTSના સત્તાવાળાઓ દ્વારા મહિલા મુસાફરોને એક ખાસ ભેટ આપી છે. આ દિવસે બહેનો AMTS બસમાં મફતમાં મુસાફરી કરી શકશે.રક્ષાબંધનમાં મોટી સંખ્યામાં મહિલાઓ ભાઈને રાખડી બાંધવા માટે તેમના ઘરે જતી હોય છે.
પ્રાપ્ત રિપોર્ટ મુજબ, રક્ષાબંધન તહેવાર નિમિતે AMTSમાં મહિલાઓ માટે મુસાફરી ફ્રી રાખવાનો નિર્ણય લેવાયો છે. પરિણામે 19 ઓગસ્ટ સોમવારના દિવસે મહિલાઓ AMTSમાં ફ્રીમાં મુસાફરી કરી શકશે. એટલે કે, સમગ્ર દિવસ દરમિયાન બહેનો પાસેથી કોઈ ચાર્જ લેવામાં આવશે નહીં.સવારે બસના શરૂઆતથી લઈ રાત્રે બસ બંધ થાય ત્યાં સુધી કોઈ પણ રૂટ અને સ્થળની AMTS બસમાં મહિલાઓને ટિકિટ લેવાની રહેશે નહીં. ગત વર્ષે રક્ષાબંધનમાં 75 હજારથી વધુ મહિલાઓએ મુસાફરી કરી હતી. ત્યારે ચાલુ વર્ષે પણ રક્ષાબંધનના તહેવારમાં મહિલાઓને મફતમાં મુસાફરી કરી શકે તેઓ નિર્ણય લેવામાં આવ્યો હતો.
તમને જણાવી દઈએ કે, અમદાવાદની લાલ બસ એટલે કે, AMTSમાં રોજના 4.27 લાખથી વધુ મુસાફરો મુસાફરી કરે છે. જેમાં બે લાખ મહિલા મુસાફરોનો પણ સમાવેશ થાય છે. જેના પગલે લાખો બહેનો રક્ષાબંધનના દિવસે ફ્રી મુસાફરીનો લાભ મેળવી શકશે.