અમદાવાદ : PM નરેન્દ્ર મોદીના ત્રણ દિવસીય ગુજરાત પ્રવાસનો આજે બીજો દિવસ છે. ત્યારે અનેક વિકાસ કાર્યોની ભેટ તેમણે ગુજરાતને આપી છે. વડાપ્રધાન મોદી અમદાવાદથી ગાંધીનગર મેટ્રો ટ્રેન ફેઝ-2નું લોકાર્પણ કરીને અમદાવાદ GMDC ગ્રાઉન્ડ પહોંચ્યા હતા. PM મોદી ઓપન જીપમાં લોકોનું અભિવાદન ઝીલતા સ્ટેજ સુધી પહોંચ્યા હતા. તેમણે GMDC ગ્રાઉન્ડ ખાતેથી અમદાવાદને 8000 કરોડના વધુ વિકાસ કાર્યોની ભેટ આપી છે.
પ્રાપ્ત રિપોર્ટ મુજબ, અમદાવાદના GMDC ગ્રાઉન્ડમાં PMનો ભવ્ય સન્માન સમારોહ યોજાયો હતો. આ દરમિયાન PM મોદી ખુલ્લી જીપમાં લોકો વચ્ચેથી અભિવાદન ઝીલતાં ઝીલતાં મુખ્ય સ્ટેજ સુધી પહોંચ્યા હતા. આ કાર્યક્રમમાં તેમણે 8000 કરોડથી વધુનાં વિકાસકાર્યોનાં ખાતમુહૂર્ત-લોકાર્પણ કર્યાં હતાં.તેમજ ઔડાના મકાન, નમો ભારત રેપિડ મેટ્રોને લીલીઝંડી આપી છે. અમદાવાદ-ભુજ વચ્ચે નમો ભારત રેપિડ મેટ્રોનો પ્રારંભ થયો છે. PM મોદીએ આવાસ યોજનાના લાભાર્થીઓને ચાવી સોંપી છે.
અમદાવાદના GMDC ગ્રાઉન્ડ ખાતે PM મોદીએ સંબોધન કરતા જણાવ્યું છે કે, ગુજરાત માટે આજનો દિવસ અન્ય કારણોસર પણ ખાસ છે.નમો ભારત રેપિડ રેલ આજથી અમદાવાદ અને ભુજ વચ્ચે દોડવાની શરૂઆત થઈ છે. નમો ભારત રેપિડ રેલ દેશના એક શહેરથી બીજા શહેરમાં દરરોજ મુસાફરી કરતા આપણા મધ્યમ વર્ગના પરિવારોને ઘણી સગવડ પૂરી પાડવા જઈ રહી છે.
આ સાથે જ તેમણે ગુજરાતની જનતાનો આભાર માનતા જણાવ્યું હતું કે, “ત્રીજી વખત પ્રધાનમંત્રીના શપથ લીધા બાદ ગુજરાત આવ્યો છું. ગુજરાત મારી જન્મભૂમિ છે. ગુજરાતે મને જીવનની દરેક શીખ આપી છે. તમે મારા પર અપાર પ્રેમ દર્શાવ્યો છે. દીકરાએ આજે ઘરે આવીને આશીર્વાદ લીધો છે. આશીર્વાદથી નવી ઊર્જા મળે છે. મોટી સંખ્યામાં લોકો આશીર્વાદ આપવા આવ્યા છે.”
PM મોદીએ દેશહિતમાં કરેલા કાર્યો જણાવતા કહ્યું હતું કે, ‘‘અમે ત્રીજી ટર્મના પ્રથમ 100 દિવસ મહત્વના નિર્ણય લીધા છે. દિવસ-રાત જોયા વિના કામ કર્યું છે. દેશ-વિદેશમાં જે પ્રયાસ કરવાના હતા તે કર્યા છે. કોઈ પણ કસર છોડવામાં નથી આવી. છેલ્લા 100 દિવસમાં કેવી કેવી વાતો થઈ રહી છે. કેટલાક લોકો મારી મજાક ઉડાવવા લાગ્યા છે. અલગ-અલગ તર્ક-વિતર્ક દેખાડવા લાગ્યા છે.’’
