અમદાવાદ : ગત 14 સપ્ટેમ્બરના રોજ અમદાવાદના બોપલમાં અજાણ્યા વાહનની ટક્કરથી રોડ ક્રોસ કરી રહેલા સિક્યુરિટી ગાર્ડનું મોત નીપજ્યું હતું. આ મામલે મૃતકના ભાઈએ અજાણ્યા વાહનચાલક વિરૂદ્ધ બોપલ પોલીસમાં ફરિયાદ નોંધાવી છે. જે અંગેની તપાસમાં આ અકસ્માત મર્સિડીઝ કારથી બિલ્ડરના સગીર દીકરાએ કર્યો હોવાનું તપાસમાં સામે આવ્યું છે. આ ઉપરાંત અકસ્માત કરનાર ગાડીના CCTV ફૂટેજ પણ સામે આવ્યા છે. જેમાં આરોપી ફૂલ સ્પિડમાં જતો દેખાય રહ્યો છે. હાલ આ મામલે બોપલ પોલીસે આરોપી વિરુદ્ધ કાર્યવાહી હાથ ધરી છે.
પ્રાપ્ત રિપોર્ટ મુજબ, અમદાવાદના બોપલમાં 14 સપ્ટેમ્બરની રાત્રે હિટ એન્ડ રનની ઘટના બની હતી. જેમાં એક બિલ્ડરના સગીર પુત્રએ અકસ્માત સર્જ્યો હોવાનો ખુલાસો થયો છે. સગીર કાર ચાલકે સિક્યુરિટી ગાર્ડને અડફેટે લીધો હતો. જેમાં સિક્યુરિટી ગાર્ડનું ઘટનાસ્થળે જ મોત નિપજ્યું છે. જેમાં નામી બિલ્ડર મિલાપ શાહના પુત્રએ અકસ્માત સર્જ્યો હોવાનો ખુલાસો થયો છે. બિલ્ડર મિલાપકુમાર શાહના સગીર પુત્રએ પૂરઝડપે કાર ચલાવીને રોડ ક્રોસ કરી રહેલા સિક્યુરિટી ગાર્ડને ટક્કર મારી હતી.
રિપોર્ટ મુજબ, બોપલમાં વિસ્તારમાં રહેતા 34 વર્ષીય યુવાન ગોવિંદસિંગ રામબરનર્સિંગ સિક્યુરિટી ગાર્ડ તરીકે નોકરી કરતા હતાં. તેમજ તેઓના ભાઈ જસવંતસિંગ રામબરનસિંગ પણ શાશ્વત એપાર્ટમેન્ટમાં સિક્યુરિટી તરીકે નોકરી કરે છે. બંને ભાઈઓ શનિવારની રાત્રિના સમયે ફરજ પર હતા. દરમિયાન સાડા અગિયારેક વાગ્યાના સુમારે ગોવિંદસિંગ મારુતી મેડિકલની સામે આવેલ પાનના ગલ્લા ઉપર તમાકુ લેવા ગયા હતા.
આશરે પોણા બારેક વાગ્યાના સુમારે ગોવિંદસીંગ રોડ ક્રોસ કરતા હતા, તે દરમિયાન કોઇ અજાણ્યા કારચાલક અકસ્માત કરી ભાગી ગયો હતો. જે બાદ ગોવિંદસિંગને 108 મારફત સોલા હોસ્પિટલ ખસેડવામાં આવ્યા હતા. જ્યાં સારવાર દરમિયાન ડોક્ટરોએ તેમને મૃત જાહેર કરતા જશવંતસિંગે બોપલ પોલીસમાં અજાણ્યા વાહનચાલક વિરૂદ્ધ ફરિયાદ નોંધાવી હતી.
મૃતકના ભાઈની ફરિયાદના આધારે બોપલ પોલીસે સીસીટીવી કેમેરા સહિતની મદદથી કારચાલકની શોધખોળ હાથ ધરી હતી. જેમાં પોલીસે અકસ્માત કરનાર ગાડીના CCTV ફૂટેજ મળતા આરોપીની ઓળખ કરી લીધી છે. મર્સિડીઝ કારનો ચાલક બિલ્ડર મિલાપકુમાર શાહનો સગીર દીકરો હોવાનું સામે આવ્યું છે. બિલ્ડરના સગીર પુત્રએ પૂર ઝડપે કાર ચલાવીને રોડ ક્રોસ કરી રહેલા સિક્યુરિટી ગાર્ડને ટક્કર મારી હતી. હાલમાં બોપલ પોલીસે સગીર આરોપી વિરુદ્ધ કાર્યવાહી હાથ ધરી છે.