અમદાવાદ : રાજ્યના મુખ્યમંત્રી ભૂપેન્દ્ર પટેલે આજે બાળકો સાથે આકાશમાં બ્લુન ઉડાડી અમદાવાદ શોપિંગ ફેસ્ટિવલનો ભવ્ય પ્રારંભ કરાવ્યો હતો. આ તકે આતશબાજી અને સાંસ્કૃતિક કાર્યક્રમ જેવા આકર્ષણો થકી અમદાવાદ શોપિંગ ફેસ્ટિવલનો શાનદાર શુભારંભ કરવામાં આવ્યો હતો. મુખ્યમંત્રી ભૂપેન્દ્ર પટેલે વિવિધ સ્ટોલ્સની મુલાકાત દરમિયાન આશાવલી સ્ટોલ્સમાંથી સાડી અને અકીકની ટ્રે ડિજિટલ પેમેન્ટ થકી ખરીદી કરી હતી તેમજ ટેબલ ટેનિસની રમત પણ રમી હતી. મુખ્યમંત્રી ભૂપેન્દ્ર પટેલે ‘અમદાવાદ શોપિંગ ફેસ્ટિવલ’ના શુભારંભ પ્રસંગે આ શોપિંગ ફેસ્ટિવલને લગતી ફિલ્મનું લોન્ચિંગ પણ કર્યું હતુ.
દશેરાથી ઉત્તરાયણ સુધી ચાલનારા ભવ્ય ‘અમદાવાદ શોપિંગ ફેસ્ટિવલ’નો શુભારંભ કરાવ્યો. આતશબાજી અને સાંસ્કૃતિક કાર્યક્રમના સથવારે આ અવસર ખૂબ હર્ષપૂર્ણ બની રહ્યો.
વિદેશની ધરતી પર જે પ્રકારે શોપિંગ ફેસ્ટિવલનું આયોજન કરવામાં આવતું હોય છે, એવા જ શોપિંગ ફેસ્ટિવલનો પ્રારંભ માનનીય વડાપ્રધાન… pic.twitter.com/oQPQqPV15H
— Bhupendra Patel (@Bhupendrapbjp) October 12, 2024
અમદાવાદ મ્યુનિસિપલ કોર્પોરેશન અને રાજ્ય સરકારના સંયુક્ત ઉપક્રમે 12 ઓક્ટોબર (દશેરા)થી 14 જાન્યુઆરી (ઉત્તરાયણ) સુધી શોપિંગ ફેસ્ટિવલ યોજાશે. આ 95 દિવસનો શોપિંગ ફેસ્ટિવલ સિંધુભવન રોડ, સીજી રોડ, કાંકરિયા- મણિનગર રોડ અને નિકોલ મોડલ સ્ટ્રીટ એમ કુલ ચાર મુખ્ય જગ્યા સહિત 14 સ્થળ પર થશે. 10 ઓક્ટોબર સુધીમાં આ શોપિંગ ફેસ્ટિવલમાં હોટલ, રેસ્ટોરન્ટ, મોટી બ્રાન્ડેડ દુકાનો, શોપિંગ કોમ્પ્લેક્સ, નાના દુકાનદારો પણ જોડાશે. આ ફેસ્ટિવલમાં જોડાવા માટે વેપારીઓ અને ગ્રાહકોએ રજિસ્ટ્રેશન કરવાનું છે. આ ફેસ્ટિવલમાં જતા ગ્રાહકોને બસની સુવિધા ફ્રીમાં મળશે.
અમદાવાદ શોપિંગ ફેસ્ટિવલ અંતર્ગત વિવિધ સ્ટોલ્સની મુલાકાત લઈને ડિજિટલ પેમેન્ટથી ખરીદીનો આનંદ લીધો. #ASF2024 #AhmedabadShoppingFest pic.twitter.com/vrqWLvRCgf
— Bhupendra Patel (@Bhupendrapbjp) October 12, 2024
આ ફેસ્ટિવલમાં 4 મુખ્ય શોપિંગ ડિસ્ટ્રિક્ટ- સિંધુ ભવન રોડ, સીજી રોડ રોડ, નિકોલ મોડર્ન સ્ટ્રીટ, અને કાંકરિયા રામબાગ રોડ ઉપરાંત સાબરમતી રિવરફ્રન્ટ, માણેક ચોક, લૉ ગાર્ડન, ગુર્જરી બજાર, સાયન્સ સિટી, વસ્ત્રાપુર, પ્રહલાદ નગર રોડ અને શોપિંગ મોલ્સ (દા.ત. અમદાવાદ વન મોલ પેલેડિયમ મોલ, ઇસ્કોન મેગા સીજી સ્ક્વેર, પેવેલિયન મોલ) સહિત 14 નિયત હોટસ્પોટ્સ ખાતે આયોજિત કરાયું છે.
અમદાવાદ શોપિંગ ફેસ્ટિવલના શુભારંભ પ્રસંગે સહકાર રાજ્ય મંત્રી જગદીશ વિશ્વકર્મા, અમદાવાદનાં મેયર પ્રતિભા જૈન, અમદાવાદ પશ્ચિમના સાંસદ દિનેશ મકવાણા, સ્થાનિક ધારાસભ્યો, ડેપ્યુટી મેયર જતીન પટેલ, સ્ટેન્ડિંગ કમિટીના ચેરમેન દેવાંગ દાણી, અગ્ર સચિવ રાજીવ ટોપનો, યુવક સેવા સાંસ્કૃતિક પ્રવૃત્તિઓ વિભાગના અગ્ર સચિવ અશ્વિનીકુમાર, મ્યુનિસિપલ કમિશનર એમ.થેન્નારસન સહિત મ્યુનિસિપાલિટીના ઉચ્ચ અધિકારીઓ-પદાધિકારીઓ અને વિશાળ સંખ્યામાં અમદાવાદીઓ ઉપસ્થિત રહ્યા હતા.