અમદાવાદ : શહેરના રાણીપના એનઆરઆઈ વૃદ્ધને પાર્સલમાંથી ડ્રગ્સ મળ્યું હોવાની કહીને સાઈબર ગઠિયાઓએ 25.62 લાખ પડાવી લીધા છે. મુંબઈ જીપીઓના અધિકારી તરીકે ઓળખ આપીને વૃદ્ધ સાથે મહિલાએ ફોન પર વાત કરી હતી. એ પછી મુંબઈ સાઈબર ક્રાઈમના અધિકારી તરીકે ઓળખ આપી તેમને ઘરમાં ડિજિટલ એરેસ્ટ કર્યા હતા. જો પૈસા નહીં આપે તો અમદાવાદથી મુંબઈ લઈ જવાની ધમકી આપી હતી.
પ્રાપ્ત રિપોર્ટ મુજબ, રાષ્ટ્રદીપ સોસાયટીમાં રહેતા મનુભાઈ પટેલ(73) ના પરિવારના તમામ સભ્યો અમેરિકા રહે છે જ્યારે મનુભાઈ અને તેમના પત્ની દર વર્ષે અમેરિકા જતા-આવતા રહે છે. 20 ડિસેમ્બરે અજાણ્યા નંબરથી મહિલાએ ફોન કરીને વૃદ્ધને ચાઈના મોકલેલા પાર્સલમાંથી 6 પાસપોર્ટ, 5 એટીએમ કાર્ડ, કપડાં, લેપટોપ અને 50 ગ્રામ એમડી ડ્રગ્સ મળી આવ્યું હતું. વૃદ્ધે કહ્યું કે, મેં કોઈ પાર્સલ મોકલ્યું નથી.હવે આ ગેરકાયદેસર પાર્સલને લઈને મુંબઈ સાયબર ક્રાઈમમાં તમારા વિરૂદ્ધ કેસ દાખલ કરવામાં આવ્યો છે. આવુ કહીને મુંબઈ સાયબર ક્રાઈમના એક અધિકારી સાથે વાત કરાવવાનું કહી ગઠિયાએ વીડિયો કોલ કર્યો હતો. જેમાં મુંબઈ સાયબર ક્રાઈમમાંથી જુનિયર ઓફિસર સંદીપ ડાંગર તથા ડીસીપી બાલસિંગ રાજપૂત બોલી રહ્યા છીએ એવું ઠગોએ કહ્યું હતું. તેમણે કહ્યું કે તમારા વિરૂદ્ધ મની લોન્ડરિંગ અને ડ્રગ્સનો કેસ દાખલ કરવામાં આવ્યો છે. જેથી ધરપકડ પણ થશે અને મુંબઈ લઈ જઈને સાત વર્ષ સુધીની તમારે જેલની સજા ભોગવવી પડશે.
આમ કહીને NRIને કહ્યું કે તમારા પાસપોર્ટને પણ અમે જપ્ત કરી દઈશું. એટલું જ નહીં અમેરિકા પણ તમે નહીં જઈ શકો એવી ધમકી આપી હતી. સાયબર ઠગોએ બાદમાં કહ્યું કે તમારા એકાઉન્ટમાં પછી જેટલા પણ રૂપિયા પડ્યા છે તે RBIના સ્પેશિયલ એસ્ક્રો એકાઉન્ટમાં ફોરેન્સિક વેરિફિકેશન માટે મોકલવા પડશે. આ વેરિફિકેશન થઈ ગયા પછી તમને તમારા રૂપિયા પરત મળી જશે. જેથી તેમણે અલગ અલગ બેન્ક એકાઉન્ટથી FD તોડાવી કાઢી અને કૂલ 25 લાખ 62 હજાર રૂપિયા આરટીજીએસ મારફતે સાયબર ઠગોને મોકલી આપ્યા હતા. હવે આ રૂપિયા પરત ન આવતા તેમણે જાણ થઈ કે આ તો કદાચ સ્કેમ થઈ ગયો છે. જેથી કરીને તેમને તાત્કાલિક સાયબર ક્રાઈમ પોલીસ સ્ટેશને જાણ કરી દીધી હતી. તેમણે આ મામલે ફરિયાદ નોંધાવી દીધી છે અને પોલીસે પણ તપાસ શરૂ કરી દીધી છે.
સાઈબર ગઠિયાઓએ વૃદ્ધને કહ્યું કે, તમારી ઉપર 24 કલાક સર્વેલન્સ રખાયું છે. અમારા પોલીસવાળા ખાનગી કપડામાં તમારા ઘરની બહાર ઊભા જ છે. તેવું કહીને 24 કલાક વીડિયો કોલ ચાલુ રખાવી કોઈની સાથે વાત ન કરવા અને કોઈને ઘરમાં આવવા ન દઈ ડિજિટલી અરેસ્ટ કરી રાખ્યા હતા.