અમદાવાદ : અમદાવાદના બોપલ વિસ્તારમાં એક સગીર વયની પ્રેમિકાએ પોતાના મિત્ર સાથે પોતાના ઘરે ચોરી કરી હોવાની ઘટના સામે આવી છે. આ ઘટનાને લઈને સાવકા પિતાએ પોલીસને જાણ કરતા બોપલ પોલીસે આ મામલે ગુનો નોંધી સગીરા સામે કાર્યવાહી કરીને તેના પ્રેમીને ઝડપી લઇ વધુ તપાસ હાથ ધરી છે.
પ્રાપ્ત રિપોર્ટ મુજબ, શહેરના બોપલ વિસ્તારમાં આવેલ ક્લબ ઓ સેવન પાસે રહેતા 43 વર્ષીય આધેડ ડી.જે. ચલાવવાની ફર્મ ધરાવે છે. આધેડે પોતાની કિંમતી વસ્તુઓ, રોકડા અને દાગીના મુકવા માટે રૂમના કબાટમાં એક લોકર રાખ્યું હતું. ગત સપ્ટેમ્બર માસમાં આધેડને એક્ટિવાના કાગળો લોકરમાં મૂકવાના હોવાથી તેમણે કબાટ ખોલ્યું ત્યારે લોકર ગાયબ હતું. આધેડે ઘરમાં તપાસ કરતા લોકર મળી આવ્યું નહોતું. લોકરમાં પાસપોર્ટ, જરૂરી ડોક્યુમેન્ટ, બંદૂકનું લાયસન્સ, બાર બોર બંદૂકના 22 જીવતા કારતુસ અને સોનાના દાગીના સહિત 1.57 લાખની મતા હતી.
લોકરની ચોરી થઈ હોવાની શંકા દાખવીને તેમણે સોસાયટીના સીસીટીવી ફૂટેજ તપાસ્યા ત્યારે સાવકી સગીર પુત્રી અને તેનો પ્રેમી ઋતુરાજ ચાવડા ચોરી કરીને જતા દેખાયા હતા. બંને પ્રેમી પંખીડા પુંઠાના બોક્સમાં લોકર મૂકીને ચોરી કરીને એક્ટિવા પર ભાગતા હતા. જેથી આધેડે સાવકી સગીર પુત્રીની પૂછપરછ કરતા તેણે આ મામલે કોઈ જવાબ આપ્યો નહોતો. જેથી આખરે આધેડને પોલીસનો સહારો લેવાની ફરજ પડી હતી. આધેડે આ મામલે બોપલ પોલીસને જાણ કરતા પોલીસે સગીરા અને તેના પ્રેમી ઋતુરાજ ચાવડા સામે ગુનો નોંધ્યો હતો.પોલીસે આરોપી ઋતુરાજ ચાવડાની ધરપકડ કરી વધુ તપાસ હાથ ધરી છે.
પ્રાથમિક તપાસમાં સગીરાએ પ્રેમી સાથે મળીને તમામ રોકડ વાપરી નાખીને લોકર વાસણા બેરેજમાં ફેંકી દીધું હતું. આરોપી ઋતુરાજ મૂળ માણસાનો છે અને સેલ્સમેનની નોકરી કરતો હોવાનું સામે આવ્યું છે.સગીરા અને તેનો મિત્ર ઋતુરાજ ચાવડાને બે વર્ષ પહેલાં રિવરફ્રન્ટ પર નવરાત્રી દરમિયાન સંપર્કમાં આવ્યા હતા. સગીરા ધોરણ-12માં અભ્યાસ કરે છે, બંને વચ્ચે નીકટતા વધતી ગઈ અને ગાઢ મિત્રતા બંધાઈ. સમય જતા બંને એકસાથે અવારનવાર ફરવા પણ જતા પરંતુ બંનેને હરવા ફરવા માટે પૈસાની વધારે જરૂરિયાત હોવાના કારણે બંને મળીને સગીરાના ઘરે જ ચોરીનો પ્લાન બનાવ્યો હતો.
પોલીસ તપાસમાં સામે આવ્યું છે કે આરોપી સગીરા પોતાની સાવકી માતા સાથે રહેતી હતી. સાવકી માતાએ જ બોપલ પોલીસ સ્ટેશનમાં ફરિયાદ નોંધાવી છે. તપાસમાં એ પણ સામે આવી છે કે આરોપી સગીરા અને તેના મિત્રે લોકર ચોરી કર્યાં બાદ મુદ્દામાલ કાઢીને લોકર વાસણા બેરેજમાં ફેંકી દીધું હતું. બોપલ પોલીસે આરોપીની ધરપકડ કર્યા બાદ અગાઉ સગીરા અને તેના મિત્રએ ચોરી કરી હતી કે કેમ કે તે અંગે તપાસ હાથ ધરી છે.