અમદાવાદ : તાજેતરમાં અમેરિકાએ ગેરકાયદેસર ઘૂસેલા લોકો સામે કાર્યવાહી બાદ પણ લોકોને ગેરકાયદેસર રીતે વિદેશ જવાનો મોહ ઓછો થતો નથી. અમદાવાદમાં બે મિત્રોને વિદેશ જવાની ઘેલછા ભારે પડી છે. તેઓએ કેનેડા જવું હોવાથી એક એજન્ટે તેમની પાસેથી કુલ 50 લાખ લઈને વિઝા નહીં આપી ઠગાઈ આચરી હતી. જેની ફરિયાદ સોલા પોલીસ સ્ટેશનમાં નોંધાઈ હતી. પોલીસે આરોપી એજન્ટ રાહુલ શાહની ધરપકડ કરી હતી.
પ્રાપ્ત રિપોર્ટ મુજબ, અમદાવાદના રાંચરડામાં રહેતા મનોજભાઇ પટેલ અને તેમના મિત્ર ક્ષિતિજ પ્રજાપતિને દોઢ વર્ષ પહેલાં વર્ક પરમિટ વિઝા પર કેનેડા જવું હતું. મનોજભાઇના ભાણાએ અમદાવાદના ગોતામાં બ્લ્યૂસ્કાય વિઝા એન્ડ ઇમિગ્રેશનના સંચાલક રાહુલ શાહ પાસે વિઝાનું કામ કરાવ્યુ હોવાથી મનોજભાઇ પણ રાહુલ શાહની ઓફિસે ગયા હતા. રાહુલ શાહે એક વ્યક્તિ દીઠ વિઝા પ્રોસેસનો 25 લાખ ખર્ચ કહીને ડોક્યુમેન્ટ મેળવ્યા હતા. બાદમાં પ્રોસેસ શરૂ કરી દીધી હોવાનું કહીને કેનેડાનો એપ્લિકેશન લેટર બતાવીને વધુ નાણાં મેળવી લીધા હતા.
આરોપી રાહુલ શાહે પીપીઆર રિકવેસ્ટ આવી હોવાથી પેમેન્ટ ક્લીયર કરી દેવાનું કહીને વધુ નાણાં પણ મેળવી લીધા હતા. પાસપોર્ટ જમા કરાવીને પરત આવી ગયા બાદ પણ વિઝા ન મળતા ભોગ બનનારે રાહુલ શાહનો સંપર્ક કરતા વિઝા નહીં મળે તો નાણાં પરત આપવાની બાંહેધરી આપી હતી. આરોપી 50 લાખ મેળવીને લાંબા સમય સુધી વિઝાનું કામ ન કરી આપીને ઓફિસ અને ફોન બંધ કરીને ફરાર થઇ ગયો હતો. આ મામલે સોલા પોલીસે આરોપી રાહુલ શાહ સામે ગુનો નોંધી તેની ધરપકડ કરી તપાસ હાથ ધરી હતી.