અમદાવાદ : શહેરમાં AMTS ની બસમાં મુસાફરી કરતાં પેસેન્જરો માટે રાહતના સમાચાર છે. જેમાં અમદાવાદ મ્યુનિસિપલ કોર્પોરેશને મહિલા હાઉસિંગ ટ્રસ્ટના સહયોગથી ‘કૂલ બસ સ્ટોપ’ સેવા શરૂ કરી છે. તેનો હેતુ બસ સ્ટોપ પર રાહ જોઈ રહેલા મુસાફરોને કાળઝાળ ગરમીથી રાહત આપવાનો છે. જે તાપમાનમાં 6-7 ડિગ્રીનો ઘટાડો કરવામાં મદદ કરશે.
પ્રાપ્ત રિપોર્ટ મુજબ, અમદાવાદમાં હીટ એક્શન પ્લાન હેઠળ AMC એ મહિલા હાઉસિંગ ટ્રસ્ટના સહયોગથી ગરમીથી ઝઝૂમી રહેલા અમદાવાદના લોકોને રાહત આપવા માટે ‘કૂલ બસ સ્ટોપ’ સેવા શરૂ કરી છે. લાલ દરવાજા ટર્મિનલના પ્લેટફોર્મ નંબર 7 અને 8 પર પહેલો કૂલ બસ સ્ટોપ સ્થાપિત કરવામાં આવ્યું છે. આનાથી બસ સ્ટોપ પર ઉભેલા મુસાફરોને ગરમીથી રાહત મળશે અને તાપમાનમાં 6-7 ડિગ્રીનો ઘટાડો થશે. આ એક પર્યાવરણને અનુકૂળ સિસ્ટમ હશે, જેમાં પાણીના છંટકાવ અને હવા શુદ્ધિકરણની સુવિધા હશે.
અમદાવાદમાં શરૂ કરવામાં આવેલો ‘કૂલ બસ સ્ટોપ’ પ્રોજેક્ટ આ એક પર્યાવરણને અનુકૂળ પ્રોજેક્ટ છે. જે AC કરતા ઓછો વીજળીનો વપરાશ કરશે.જ્યારે પાણીનો છંટકાવ સ્પ્રિંકલર સિસ્ટમની મદદથી કરવામાં આવશે જે ઠંડક જાળવી રાખશે. આ ‘કૂલ બસ સ્ટોપ’ સવારે 11 થી સાંજે 6 વાગ્યા સુધી ચાલશે અને દરરોજ 3000 લિટર પાણીનો ઉપયોગ કરશે.આ સિસ્ટમ ધૂળને પણ નિયંત્રિત કરશે અને હવાને સ્વચ્છ બનાવશે.
લાલ દરવાજા ટર્મિનલ પર દરરોજ 3 હજારથી વધુ લોકો બસોનો ઉપયોગ કરે છે. અમદાવાદ મ્યુનિસિપલ કોર્પોરેશન અનુસાર, આગામી સમયમાં અન્ય બસ સ્ટોપ પર પણ ‘કૂલ બસ સ્ટોપ’ સુવિધા શરૂ કરવામાં આવશે.